Thawhlehni khan Olympic football group stage khelh zawh a ni a, quarter-final-ah Argentina leh France an inhmachhawn dawn. Quarter-final lut turin Argentina hian Ukraine an hneh a, France hian group champion ni turin New Zealand an hneh ve bawk.
- Argentina 2-0 Ukraine
An match hmasa berah Morocco hneh lova tlawm nghal Argentina hian an match hnihnaah Iraq an hneh a, quarter-final lut thei tura fiahna hnuhnung an hmachhawnah 2-0 in Ukraine an hneh zui leh.
Quarter-final lut thei tura chak mamawh Argentina tan hian Ukraine lakah chawlhlawk hmain goal an thun thei lo. Chak an mamawhna a sang bawk a second half ah goal an thun thuai. Second half tan atanga minute hnihna lekah Thiago Almada chuan hmahruaina goal a thun. Almanda goal thun hnu hian hun rei tak chhung goal a luh belh thei lo. Hun rei tak goal a luh belh theih loh hnuin Claudio Echeverri chuan minute 90’+1-ah an goal hnihna thunin an hmahruaina a tizau a, poit thum hlu tak an hmu zui ta a ni.
Group B-a inkhel dangah Argentina laka chak tawh Morocco chuan 3-0 in Iraq an hneh a, group champion ni chungin quarter-final an lut. Ukraine laka tlawm tawh Morocco hian Iraq lakah an khel tha viau a, chawlhlawk hmain goal thum ngawt an thun hman. Heng an goal thum thunte hi Amir Richardson, Soufiane Rahimi leh Abde Ezzalzouli te thun a ni. Group B-ah hian Morocco leh Argentina in point 6 ve ve an hmu a, goal difference a tha zawk Morocco chu group champion an ni. Quarter-final lut zo lo pahnih; Ukraine leh Iraq in point thum ve ve an hmu bawk.
- France 3-0 New Zealand
Group A atanga quarter-final lut chiang tawh France chuan quarter-final luh beiseina la nei New Zealand an hmachhawn a, 3-0 ngawtin hnehna an chang.
France tan hian Jean-Philippe Mateta chuan minute 19-na lekah hmahruaina goal a thun. Hma taka an goal thun hi an thun belh thei lo reng a, hun tawp dawn hnaih lamah goal hnih an thun belh a, a tawp an khar tha ta thung. Minute 71-naah Désiré Doué chuan an goal hnihna thunin an hmahruaina a tizau a. Minute 74-naah Arnaud Kalimuendo chuan an goal thumna a thun zui leh bawk a, point ruk an hmuh tawh chu point thumin an belh a, point kua an hmu. Group A atang hian United State chuan point ruk an hmu a, quarter-final an lut ve bawk.
- Argentina vs France
Football ram ropui pahnih Argentina leh France te hi tunhnaiah an inhal hle a, an inkarah boruak tha lo tak a awm. Tunhnaia inhal thar leh zual, boruak nei laih an nih vangin Olympic quarter-final a an intum tur hian ngaihven a hlawh phah hle.
Copa America champion Argentina leh Euro 2016 champion Italy ten Finalissima an khel dawn tum khan ‘South America player te aiin European player ten ball an thiam zawk’ tih leh ‘an thiam zawk lo’ tih chungchangah inhnialna lian tak a awm. He inhnialna hian player te pawh a kangkai a, France player ropui Kylian Mbappe chu tawng tam langsar, Argentina player te pawhin an ngei em em a ni. Mbappe vangin Argentina leh France in boruak an nei laih. Boruak tha lo an neih hnu lawkah World Cup final-ah an intum zui leh a, France hnehin Argentina an champion. An champion hnuin Argentina si nghak Emiliano Martinez chuan France player leh mipuite chetze mawi lo hmangin a tihel a, hei hi French ten an ngei hle.
Copa America 2024-ah Argentina an champion a, champion an lawmnaah France player te tihelna leh deusawhna hla an sa. He hla hian Mbappe tihelna a lian hle bawk. Argentina hian France chu Africa khawmual hrang hrang atanga penkhawm team, French chhulchhuak awm mang lo team tiin an deu a ni ber. He an hlasak hian bor France mipuite a deng na hle a, an player te pawhin an la na viau bawk. Chu chu tuna an boruak a ni.
Ram inhal, football a inel tawk tak Argentina leh France te hi Zirtawp zanlai dar 12:30-ah semi-final luh inchuhin Matmut Atlantique-ah an inkhel dawn a, inkhel class sang tak a ni lo a nih pawhin inkhel hmuhnawm, inkhel boruak sang tak a ni ngei dawn a. Lal Niro-a’n Rome khawpui a hal dawn tuma, “Hmuhnawm tak a nih loh vek chuan rapthlak tak a ni ang,” a tih ang ngei kha a ni ang.
Olympic quarter-final dangah Morocco leh USA an intum ang a, Japan leh Spain an tum bakah Egypt leh Paraguay an inhmachhawn bawk ang.