Hnam Run chhung inkhawma nimina neihah PP Thawla, Ex-Minister leh Adviser (MNF GHQ) chuan, “Kan chan chhiat ber lai pawhin taihmak i chhuah ang u,” a ti a. ZPM sorkar chu kum khat em pawh an la kal lova, a beisei aia an that loh thu a sawi.
PP Thawla chuan, “Kum 2023 election-ah kan tla a. Tumah indem tur kan awm lo. Mangan ni kan tawh avangin ka chau mai tur a ni lo. Kan chan chhiat lai tak hian taihmak chhuah zual sauh ila.
“ZPM sorkar chu an ngen chiam angin mipuiin an sorkar-tir a. Ka lo thlir danah – budget vawi hnih han pass phawt sela an dinhmun dik tak a lang ang, ka thin. Amaherawchu, kum khat em pawh an la kal lo chungin an dinhmun chu hetiang mai hi a ni si a,” a ti.
“MNF party-ah i rinawm tlat ang u, kan ding chhuak leh dawn. Kan sorkar chhung khan Mizoramin hun khirh tak a tawk a, Pathianin MNF kha ram kaihruai turin a ruat a. Tunah chuan kan sorkar laia kan tih dik lohte siam thaa retreat nei turin min dah a ni.
“MNF hi ram leh hnam tana Pathian ruat a ni a, kan ding chhuak leh ngei ang. Chutiang tur chuan i inbuatsaih ang u,” tiin Thawla chuan an party mipuite a sawm bawk.
Inkhawm kaihruaitu K. Vanlalauva, Ex-Minister leh NCC MNF GHQ pawhin thusawiin – Vawiin August ni 2 hi hnam pasalthaten remna avanga Aizawl an luh champha a nih angin Pu Laldenga thuchah a sawiin, “Remna thuthlung hi Mizote ta a ni, hei hi a bultanna chauh a ni. Hei hi i vawng nung reng ang u,” a ti.
India leh MNF inrem avangin hnam pasaltha haw khawm turten Zoram khaw hrang hrang an paltlang dan leh mipuiten an thlawp dan a sawi, “Vawiin hi remna champha leh martarte chawimawina ni a. He hun hlu tak hi i hre reng ang u,” K. Auva chuan a ti a. Hnam sipai lo hawte zingah mi 227-ten chatuan ram an pan tawh tih a sawi bawk.