Season thar atana an inbuatsaihna lama hliam tuar Manchester United player pahnih; Leny Yoro leh Rasmus Hojlund te an chawlh rei a ngai dawn a, season tirah bul an tan ve thei dawn lo.
Manchester United hian USA lamah Arsenal an hmachhawn a, 1-2 in tlawm zawkah an tang. Arsenal laka an tlawm tum hian an player pahnih Yoro leh Hojlund te chu hliam vangin lakchhuah an ni a, inkhel an hmachhawn tluan thei lo. An player pahnihte hliam hi en dik a nih hnuin an lo na dun viau a, inkhel hmachhawn leh thei turin chawlh rei an mamawh. United defender thar Yoro hi thla thum lai a chawlh a ngai dawn a. Denmark striker Rasmus Hojlund hi chawlhkar ruk a chawlh a ngai ve dawn thung.
Defender mamawh Manchester United hian Liverpool leh Real Madrid te pawhin lak an duh Leny Yoro hi £52m zet sengin an la lut. Dedefender lar chak tak Leny Yoro hi a lcub thar tan a khelh hmasak berah hliamin a tibuai nghal a, thla thum ngawt a chawlh a ngai nghal dawn a ni. A chawlh chhungin a club thar hian Liverpool, Tottenham leh Aston Villa te an hmachhawn ang a, Europa League leh Carabao Cup vawi khat ve ve an khel hman bawk ang.
Yoro a inhliam leh tak vangin United hian defender lak luh belh an mamawh leh zual a, Everton atangin Jarred Branthwaite lak an la tum zel a. Bayern Munich atanga Matthijs de Ligt lak tumin hma an la zui zel bawk.