GIG Motors I Day Football Tournament 2024 chu August 8, Ningani khan RG Stadium-ah khelh chhunzawm a ni a, Ramhlun Athletic FC chuan Sihphir Venghlun FC lakah hnehna chang zo lo chungin semi-final an lut. Ningania inkhel dangah Bethlehem Vengthlan FC lakah SYS FC an tlawm ve thung.
Khelh thum atanga point sarih hmu tawh Ramhlun Athletic FC hian semi-final lut chiang turin Sihphir Venghlun FC lakah tlawm an pumpelh a ngai a. Hnufual zawkah tumhnih ngawt tan bawk mah se an mamawh point hlawhchhuak turin tawm an pumpelh a, Chanmari FC hnuhnung zuiin semi-final an lut.
MPL club thar Sihphir Venghlun FC hian semi-final lut thei turin RAFC lakah chak ngei an mamawh. An mamawh hnehna chan tumin tan an khawh a, an khel tha viau nghe nghe. SVFC tan hian PC Lalruatsanga chuan minute 19-naah hmahruaina goal a thun a, he goal hian a fuih phur hle nghe nghe. Goal chhuah hmasa zawkah tang mah se RA FC an buai lova, chawlhlawk hmain an si phurh an sut hman. Minute 31-naah Letminton Singson chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal li ngawt a luh belh. Chak mamawh Sihphir Venghlun FC tan Malsawmtluanga Pautu chuan minute 56-naah hma an hruai nawn lehna goal a thun. Hma an hruai nawn leh vangin an phur a, semi-final luh beiseina lian tak an nei hman. Hnufual zawkah tang nawn leh mah se RAFC in an huaisenzia an lantir nawn leh a, minute li chhung leka goal hnih thunin an khingpuite an chhang let. RAFC tan hian ‘Man of the match’ a thlan zui tak Flavius Lalruatkima chuan minute 75-naah goal thunin an si phurh a sut zet phawt a. An si phurh sutna goal a thun atanga minute li hnu lekah hma an hruai letna goal a thun zui leh bawk.
An hmahruaina tum hnih ngawt an humhim zawh loh hnuin SVFC in si an phur let a, an tlawm zui teuh hle nghe nghe. Hun rei tak si an phurh hnuin Lalremruata chuan minute 90-naah goal thunin an si phurh a sut thei hram a, an khingpuite nen 3-3 in an inhnehtawk zui ta a ni. An khingpui lakah an chak zawh loh vangin Sihphir Venghlun FC hian uiawm takin semi-final an lut zo lo.
Sihphir Venghlun FC lakah tlawm an pumpelh vangin Ramhlun Athletic FC in khelh li atangin point 8 an hmu a, Group A atangin semi-final an lut. Group A-ah hian khelh li atanga point 10 hmu Chanmari FC chu group leader an ni a, semi-final an lut.
Ningani a inkhel dangah Group A-a tabla mawngphah pahnih SYS FC leh Bethlehem Vengthlang FC an inkhel a, BVT FC in MPL team SYS an hneh a, point thum hmu chungin an tla. MPL 11 a bul tan tha tak SYS hian I Day inelna lamah point an hmu ve lova, khelh li an hmachhawnah an tlawm vek.
He inkhelah hian khelh thum atanga point la hmu lo BVT FC tan Sam Tlapyu chuan minute 33-naah hmahruaina goal a thun a. Joseph Lalfakzuala-‘n goal khat a thun bakah SYS player John Lalthakima chuan an lamah a ti-goal bawk. SYS tan Isak Lalmalsawma leh Stephen C Malsawmtluanga ten goal thun bawk mah se BVT FC lakah tlawm an pumpelh thei ta chuang lo a ni.