LBS Suzuki 23rd Inter Branch YMA Volleyball Tournament 2024 khelh chhunzawm zel a ni a, Ningani khan champion lai Hunthar chuan hnehna changin Bungkawn an hneh. Ningani a inkhel dangah champion tura rinkai zinga mi Khawhai leh Chhinga Veng pawhin hnehna an chang bawk.
Volleyball hmanga YMA Branch te intihsiaknaa vawi thum champion tawh a, champion lai nei mek Hunthar hian Bungkawn hmachhawnin bul an tan. Volleyball a chhiat lai nei lo Hunthar hian Bungkawn lakah an khel tha viau a, harsatna lian tawk lova set thum la zawnin 25-17, 25-15, 25-22 in an chak. Hunthar hian champion nawn leh tumin tan an khawh a, an champion nawn thei a nih chuan YMA Volleyball a mipa inelnaah vawi li champion thei hmasa ber an ni ang.
Champion lai Hunthar an chak rual hian pahnihna ni mek leh Inter Village champion Khawhai pawhin awlsam takin hnehna an chang a, an khingpui Biate lakah set an hloh lo. Khawhai hian an khaw thenawm, tunhma atang tawha an elpui lian ni thin Biate lakah hian 25-18, 25-11, 25-19 in an hneh. YMA leh Inter Villa competition a final lut zawn thei Khawhai hian ngaiohven an hlawh a, ngaihven phuin an khel a hmuhnawm viau bawk. Khawhai hian Volleyball thiam khua Ngopa an hmachhawn leh dawn a, anni pahnih inkhel tur hi inkhel hmuhnawm tak a nih ngei a rinawm. Ngopa an hneh a nih chuan Tualcheng leh Kanan inkhela chak zawk zawk an hmachhawn zui leh dawn a. Fiahna hautak an hmachhawn zui leh ang.
Ningani hi mipa lama team lian inlanni a ni a, vawithum champion tawh Maubawk pawhin hnehna lian an chang a, team lian Electric veng lakah set khat hloh chungin hnehna an chang. YMA Volleyball final an luha hnehna la chang vel Maubawk leh Volleyball a veng lian ni thar, Indoor nei tha Electric Veng lakah (26-24, 25-23, 23-25, 25-20 in hnehna an chang.
Hunthar, Khawhai leh Maubawk ten hnehna an chan rual hian team lian inkhel dangah Muana Veng leh Chhinga Vengte pawhin hnehna an chang ve bawk. Muana Veng hian an khingpui Zawlnuam Vengpui chu 25-15, 25-16, 28-26 in an hneh a, Chhinga Vengin an khingpui Chungtlang chu 25-17, 21-25, 25-19, 25-16 in an hneh bawk. Ningani a hnehna chang langsar zingah Pro Volleyball league team thar Khawbel an tel bawk a, Khawbel hian an khingpui Thenzawl Vengthlang chu 27-25, 25-20, 25-17 an hneh.
Ningani a hmeichhe inkhelah hmeichhe lama team tha tak ni thin Dawrpui Vengthar chu Durtlang lakah an vanduai a, deciding set-ah an chak lo.