Congress Thalai (MPYCC) chuan Thawhtanni a MJA leh Mizoram Police ṭangkawpin ‘Seminar On Cyber Crime’ Serchhip Press Club-a neihah bialtu MLA leh Chief Minister ni bawk Pu Lalduhoma chuan hmeichhe hrang hrang atangin Sextortion video call vawi 100 chuang ka dawng tawh a, nizan pawh khan vawi engemaw zat ka dawng a, ka block char char a, min rawn call tute hi hmeichhia vek an ni, tih sawiin heng hmeichhia te hi an thlalak (picture) atang chuan an nalh thei em em a, a tak an nih leh nih loh chu ka hrelo, ka block tawh zawng zawng hi za chuang an ni tawh, tih a sawi a. He thil hi sorkar mualphona leh Kohhran beng ti kham thei thil tenawm leh rapthlak takah Congress thalai chuan a ngai a. Vawi 100 chuang Sextortion Video Call dawng tur chuan Chief Minister hian a lo REPLY ve zauh zauh thin em ni tih hi Congress thalai chuan a zawt a ni, tiin nimin khan thuchhuah an siam.
Hetianga Chief Minister Pu Lalduhoma’n mipat hmeichhiatna lam hawia in vauna leh thlemna a tawk hi khawvel ram hruaitu dang chunga thleng ngai lo a nih avangin Congress thalai chuan chhui chhuak ngei turin Mizoram Sorkar a phut a ni, an ti a.
Sex-tor-tion hi website/pornography/ sexlink lam lut thin lo te leh hmeh tur hmet thin lo tan phei chuan an sex-tor-tion video call hi an tawng mawhin hetiang buaina hi an tawk ngai lo. Chief Minister hian amah in sawi ropui a tumna lamah in sawi theih nan, amah beitute ruahman ni awm ten a sawi zui bawk a. A zia lovin a zahthlak takzet a ni, an ti bawk.
Chief Minister hi hmeichhia nena sawizawm a ni fo mai a. Zanlaiah nula nena Whatsaap message-a inbiak te, puipunna hmuna hmeichhia nena lam fo leh khawi lo kalna hmuna hmeichhe kut lo hum vung vung hmuh tur leh hriat tur a awm fo leh KS Market ṭhat zia a sawi te phei hi chu Mizoram, Kristian state-a thil thlengah chuan a rapthlak takzet. MNF sorkar ah khan mipat hmeichhiatna lam hawia ngaih theih sawi tur a awm fo bawk, tiin.
Hetianga sorkarna chelhtute leh mipat hmeichhiatna inzawm tlat avang hian Mizoramin chhiatna hrang hrang a tawh phah niin Congress thalai chuan a ngai a. Chief Minister Pu Lalduhoma Video hmanga mipat hmeichhiatna lam hawia betu te zawng zawng hi sorkarin chhui chhuak ngei turin Congress thalai chuan ZPM sorkar a phut tlat a ni, tiin an thuchhuahah chuan an tarlang.