Premier League champion Manchester City chuan kum 2006 hnua a vawikhatna atan a zawnin match nga an tlawm a. An mikhual Tottenham Hotspur lakah goal li chhuahin 4-0 in an tlawm.
Inrinni zanah Etihad Stadium-ah City in Spurs an mikhual a. Mahni mualah match 52 tlawm lova an kaltluang lai chu a mualphothlak thei ang berin a tawp. Pep Guardiola pawlte hi tunhnaiah an che buai hle a, an buaina in kiam lam a la pan thei lo.
London club tan hian English midfielder James Maddison chuan goal hnih a khung a, Pedro Porro leh Brennan Johnson ten goal dang khung belhin City in kum 2003 a Arsenal laka 5-1 a an tlawm hnua mahni muala an tlawm chian ber tum an hmang.
- Inkhel chu
Inkhelh hma in City manager Pep Guardiola kum hnih contract ziah belh in chanchinthar a luah a, City hi an coach ropui hnuaiah buai rei tura ngaih an ni lo. Lehlamah Ange Postecoglou hnuaiah Spurs in football hmuhnawm khel mahse chetsual an nei thin a, hei vang hian Australian coach hi fans zingah seltu an awm.
Inhliam Rodri tel lovin City in inkhel an tan a, nidang ang thovin bul an tan chhe lo. Chance tha an nei nual. Mahse Spurs in City full-back Josko Gvardiol an bitum fuh. Minute 13-naah Dejan Kulusevski chuan a lakah awlsam taka ball lalutin Maddison-a goal khung turin duhthusam a tha ball a vawrh.
Minute sarih hnuah Gvardiol bawk a che sual. A ball pass ‘risk’ chu Maddison-a’n la in Son Heung-min a pe a, penalty area ah tlanlutin Son-a ball fing atang an goal hnihna a khung.
Second half-ah City danglam beiseina a lian. Mahse Spurs bawk an inlar. Minute 52-naah counter-attack atang thovin Dominic Solanke ball pek tha atang Pedro Porro chuan an goal thumna a khung a. Huntawp dawnah tha thar Brennan Johnson leh Timo Werner ten City tlarhnung chhaihbuai in Johnson-a’n an goal hnuhnung ber a khung.
- A zawh lam
Inkhel zawhah Tottenham manager Ange Postecoglou chuan a naute a fak a, “Ka player-te ka chhuang hle. City khelmual a va luh hi thil hautak leh huphurhawm a ni a, kawng engkima chona lian a ni. Vawiinah chona kawng engkim a hahthlak chu kan hmachhawn a, inpekna leh tumruhna nen football tha kan khel. Vawiinah keimahni in danglamna kan siam a ni.” a ti.
“City lakah chuan huntha kan neihte bawhpelh theih a ni lo. Kan duhthusam ang takin tiang turin kan che zel thei.” a ti a. Goal hnih khungtu Maddison chu fakin, “A goal khung ringawt a ni lo. Inkhel thununna kawngah kan tan a pawimawh dawn tih kan hria a, goal ven kawngah pawh a thawhhlawk hle.” a ti bawk.
Manchester City manager Pep Guardiola ve thungin, “Tun dinhmunah tlarhnung lamah kan pan hle. Nidang ang bawkin tha pangngai takin bul kan tan a, goal hlauhawm insiam nual mah ila kan khung loh hnuah goal kan chhuah ta zawk. Kan chhuah belh leh zel bawk avangin kha kan rilru nasa takin a nghawng a ni.”
“Kum riat chhungin hetiang dinhmun hi kan paltlang ngai lova, chuvangin tunah kan paltlang a, kan insiamthat hi a ngai a ni. Kan khelh leh turah chuan kan insiamthat ngei a tul.” tiin UEFA Champions League a Feyenoord an hmachhawn tur leh karleh a Liverpool nen an inkhel tur a thlir tel.
- Inkhel dangte
Premier League champion tum zing ami Arsenal in tunhnaiah point hloh ngah mahse title chuh tur zingah an la tel tih an lantir a. Man City tlawm zanah 3-0 in Nottingham Forest an hneh.
Emirates Stadium-ah Gunners hian an mikhual Forest hi an thunun a. Minute 15-naah Bukayo Saka chuan goal mawi a khung a. Half-time zawha substitute bench atanga dah luh Thomas Partey chuan an goal hnihna khungin rawlthar beiseiawm Ethan Nwanero chuan an goal thumna a khung.
Forest hi tun season a beisei khum nimahse Inrinni zanah erawh kawng engkimah Arsenal an pha lova Ryan Yates leh Nicolas Dominguez ten goal hlauhawm an neih bakah goal khungna remchang mumal an inseam lo.
Season bul tan tha Chelsea pawhin pathumna luah turin Leicester City chu 2-1 in an hneh ve bawk.
King Power Stadium a inkhelah hian Blues tan striker Nicolas Jackson chuan goal hmahruai a khung a. A goal khung siamsaktu Argentine midfielder Enzo Fernandez chuan an goal hnihna a khung a. Leicester City hian huntawp dawnah penalty atangin Jordan Ayew hmangin goal an khung ve a ni.