Ganderbal, Jammu & Kashmir-a private company pakhat inkulhnaa doctor leh nurse paruk thahnaa inhnamhnawih pakhat chu venhim hnathawktute nen an inbeihnaah kah hlum a ni.
Junaid Ahmed Bhat-a hi Pakistan-a Lashkar-e-Taiba firfiak pawla mi a ni.
Damdawia thawkte beihna bakah hian Gagangir leh hmun danga firfiaka chetnaah pawh a inhnamhnawih.
Cordon & search operation (CASO) hi Jammu & Kashmir Police-in an thlak a. “Lashkar firfiak pakhat, ‘A’ category terrorist, Junaid Ahmed Bhat chu thah a ni a. Gagangir, Ganderbal leh hmun dang danga civil mi thahnaa inhnamhnawih a ni,” tiin police officer-in a sawi.
Officer chuan Bhat-a hi Kulgam-a cheng a ni a. Kum khat vel a chin hriat a ni tawh lo va, Ganderbal an beihnaah hian CCTV-ah AK series assault rifle a keng lai a lang.
CASO tan hnuah hian Dachhigam ramngaw huam chinah chuan venhimna khauh taka kalpui a ni a. Dachhigam hi Srinagar daia national park awmna a ni.
CCTV-a Bhat-a hmuh a nih hnuah hian intelligence agency-te chuan Kashmir phuaikuama tual chhung mi, a ruka firfiak pawl zawm an awm thar thin nia rinna an neih phah.
Jammu & Kashmir Lieutenant Governor Manoj Sinha hova venhimnaa mawhphurhtu sangte chu police officer lawk leh sorkar hnathawkte nen an thukhawm nghal.
Police chuan hmeichhe pahnih chu Public Safety Act tlawhchhanin firfiaka rinhlelh an nih avangin an man zui nghe nghe a. ‘Pawn lama mi firfiakte tana thawk’ tia puhin vantlang mi angin an awm a, a rukin an pui thin niin an ngai a ni.
An mi mante hi Maryama Begum leh Arshad Begum te an ni.
Police chuan an mi mante pahnih hian mi fiakfiakte hnena khân remchang leh ram hmelhmangte an hrilh a, an kaihruai thin niin an sawi a. An chet dan hi vantlang tana him lo nia an ngaih thu an sawi.
“Ram himna dinhmun derthawng zel thei tur venna atan leh an chet dan thlira rinhlelhawm tak an nih avangin PSA tlawhchhanin man an ni ta a ni,” tiin police chuan thuchhuah an siam.