Aizawl: Mizo National Front (MNF), National Executive meeting chu nimin khan Vana Pa Hall, Aizawl-ah neih a ni a. MNF President Zoramthanga’n kaihruaiin, MNF Dan bu ennawn a, siam that ngaite siam that rem tih a ni a, MNF party hmalak zel dan tur hrang hrangte rel a ni bakah resolution 10 an pass.

Meeting-ah hian VL. Krosshnehzova, General Secretary put luh, resolution 10 an pass zingah MNF President Zoramthanga leh a thawhpui Elected Office Bearer-te kaihhruaina hnuaia tunhnaia hnehna an chan leh party-in nasa taka hma an sawn zel avangin an chungah rinna leh beiseina an nghah tlat thu te, ZPM kaihhruai sorkarin sum harsatna chhuanlama nasa taka mipuite chhiah leh thil dang tam tak hmanga min run mek laia Chief Minister leh a thuihruai ten nasa taka an inhaivur lawi si hi an dem takzet thu leh, mipui chan hui a, tih retheiha an awm mek hi a pawi an tiin, he tawrhna laka chhuak tur hian MNF chuan theihtawp a chhuah zel dawn thu te a tel.

MNF resolution pass dangte:

1. Kan unaute chenna ram leh tualchhung buaina avanga sahimna zawnga rawn lutte tuamhlawm kawngah leh an thlavang hauh kawngah Mizorama sorkar chu hnam thinlung pu tawklo ah kan ngai a, kan sakhaw humhim nan pawh huaisenna tlachham hle ah kan ngai a ni. MNF chuan hmun hrang hranga kan unaute tawrhna tawmpui leh hre rengin an tan nghet takin kan ding zel dawn a. Kan unaute thlavang hauh kawnga kan MP (Rajya Sabha), Pu K. Vanlalvena’n theihtawp a chhuah thin hi lawmawm kan tiin, kan chhuang takzet a, kan thlawp tlat a ni.
2. Mizoram chhung hmun hrang hranga kawngte a chhe em em mai leh lei dawh mek hna muang lutuk hi mipui ngaihthahnaah kan ngai a, mipui tana ngaihtuahna sen aiin mahni inhaivur leh hlimhlawp lam ringawt kan sorkarin a buaipui hi lungchhiat thlak kan ti takzet.
3. Chhiah tipung ve lo tur leh sum puk ve lo tura insawi ZPM sorkarin, inhaivurna atana mipui hnen atanga Ration buhfai man 100% a an tipungte, Stamp duty 200%-a an tipungte, OIL atanga chhiah nasa taka an la te leh, thla tin mai mipui phur tirit zual tura sum a puk awlh awlh reng hi a pawi kan ti a. Heng avanga mipui nitin mamawh thil man pung chho zel kan tuar tlawk tlawk mai hi lungchhiatthlak kan tiin, mipui harsatna phuhruk thin MNF sorkar ding leh thuai turin theihtawp kan chhuah zel ang.
4. Duhthala sorkar sum chinleh tuma, thuneihna pumhmawm tum a, VC term kaltluang lai thawhpui duh lo va, thla ruk chuang zet pawt tawi a, mipuiin duh taka an thlan te zahna nei miah lova democracy an pawngsual hi demawm kan tiin, chhuanlam mumal nei lova buluk taka rorelna kalpui mek ZPM sorkar kan nei hi vanduaithlak kan ti takzet.
5. Ni 100 chhunga tih tur an intiam tihhlawhtlin an nei mumal lo leh, kum khat dawn an sorkar hnuah pawh hmalakna mumal hmuh tur awmlo ZPM sorkar kan hrawn hi mipuite kan vanduai hle a ni. An insawi anga awmlo, sawi loh ang zela khawsa sorkar hi sim a, an mawhphurhna hrechiang tawh turin kan phut a ni.
6. Kuthhnathawktute thlai thar sawhthing, hmarcha, aieng leh hmunphiah te lei ngei tura nasa taka an intiam laia lei mumal awm lo va, hmangaih leh duhsak bik hlawh tura an sawi te an hawihai mai hi pawi kan ti takzet a ni. An intiamna rate ang ngeia lei sak tawh turin ZPM kaihhruai sorkar hi na takin kan phut tlat a ni.
7. Sinlung Hills Council Election 2024-ah HPC (R) nen thawhhona tha tak hnuaia hnehna kan chang hi lawmawm kan tiin, Council huam chhung mipuite chungah lawmthu kan sawi a ni. Tluang tak leh tha taka kal turin duhsakna kan hlan a ni.
8. Mizoram mipuite Krismas leh kumthar thlamuang taka, hlim tak leh lawm taka hmang turin duhsakna kan hlan a ni.