Aizawl: UD&PA Minister K Sapdanga chuan ZPM sorkarin chhawr tangkai theih inbeiseiin, sorkar hmasa lamin an lo beidawnpui deuh tawh Public Section Undertaking (PSU) an tuai nung thar tih a sawi.
Kolasib Taitesena Hall-ah K Sapdanga hian nimin khan ZOHANDCO buatsaih State Handloom Exhibition a hawng. Hawnna inkawmah PSU-te hi sum thawhchhuak turin an beisei thin a; amaherawhchu, sum thawhchhuaktu ai mahin mihring intodelhtir (self employment) ni thei tura mi dangte tanpuina a tur a nih thu a sawi.
ZPM sorkar hi mi thenkhat tan chuan a hneawm mai thei tih sawiin K Sapdanga chuan, “Kuthnathawh leh intodelhte kan sawi uar thin a, leilung nena inzawm, lei lung hausakna haichhuah leh chhawr kawnga hmasawn kan duh a. Tunah pawh kan buaipui ber chu ‘Bana Kaih Policy’ a ni. Kan chief minister kaihhruaina hnuaiah nasa takin hma kan la mek a, bana kaih theih turin mipuiten kan ban kan lo phar chhuah ve a ngai dawn a ni,” a ti.
K Sapdanga chuan sorkarin thlai thar a buaipuina chhan hi sum leh pai deh chhuah leh hlawkna hi a pahnihna a ni a, a pakhatna chu mahni kut ngei hmanga intodelh hi a ni. Chu chuan thalaite rilruah rilru dik tuh se la, kutdawh rilru ni lo, intodelhna rilru an put hi an duh ber a nih thu a sawi bawk.
Tun hnaiah sorkarin hna hrang hrang a la a, Group D hna lakah te MA leh BA degree nei te pawh dil an awm tih sawiin UD&PA minister chuan, “Hei hian a entir chu hlawhtlinna hi zirnaah a awm ber bik lo va, taimakna leh rinawmnaah a awm a ni. Office-ah tu emaw hnuaia thawk tura inhawr tuau tuau lovin, kan kut leh ke kan thluak hmanga intodelh tura min kaihhruaitu atan ZOHANDCO hi a awm reng a ni,” tiin, an chhawr tangkai thiam chuan a hlawkna teltu tur chu ZOHANDCO ni lovin, mipuite an ni dawn tih a sawi.
Exhibition hi December 3-18, 2024 chhung awh tur niin, sorkar laipui Ministry of Textile atanga fund hmuh hmangin kumin chhungin vawi thum neih tawh a ni a, Kolasib hi kumin atana a tawpna ber tur a ni.