Aizawl: School Education Minister Dr Vanlalthlana chuan zirlaite chu sorkar hna chauh hi ‘hna’ a nih lohzia hrechiang tura a duh thu a sawi.
Thawhlehni khan SCERT buatsaihin Aizawl khawpui chhunga sorkar enkawl high school pualin Chanmari YMA Hall-ah Career Awareness Campaign neih a ni a. Hun hmanpuitu Dr Vanlalthlana chuan zirlaite chu mahni thiam thil hmanga mahni kea ding tur leh eizawnna tlak tura an thiamna tuaihriam turin a fuih a. Eng hna pawh thawk dawn se, lehkha zir that a ngaih thu leh mahni kea ding tur pawhin taima taka lehkha zir a ngaih bakah, huaisen taka mahni tuina zawngah na taka kal tur te, eizawnna tlak ngei tuipui tur te-in a chah.
Dr Vanlalthlana chuan tun lai khawvel thiamna sang zelah eizawng rual an nih meuh chuan AI (Artificial Intelligence) nen hna an inchuh tawh dawn avangin AI chhawr tangkai thiam tur leh skill development ngai pawimawh tur te, eizawnna tur kawng an zawnna kawngah eng nge ramin a mamawh, a market a tha em, tih te ngaihven a kua zawng thiam tura chahin, eng eizawnnaah pawh Pathian tih a pawimawh tih a sawi bawk.
Inkhawm hi SCERT Director Caroline Zoramthangi’n a kaihruai a. Chiko Coaching Centre atangin Lalhriatzuala leh Lalhruaitluanga, Zocareer Solution ten zirlaite hnenah eizawnna chungchang zirtirna an pe.