November thla tir khan Aizawl SP chuan thuchhuah siamin Airport road chu tlawng luia lei dawh anih dawn avangin November ni 30, 2024 thleng khar anih tur thu a puang a. Airport road Sihhmui atanga Lengpui pawh hman zui loh nghal a niin airport kal tur leh mizoram khawthlang lam kal tur zawng zawng pawh Buichali lamah an kal kual ta vek a ni.
Thlakhat zet a liam ta tihah tlawng luia lei dawh chu zawh anih tawh leh tawh loh sawi a awm ta lova. Thupuan thar a awm hek lova. Mipui erawh thuawih takin Buichali lei lamah kan la kual ta char char a. A kawng hla zawka mipui kan tlan kuala kan sum leh pai, hun hloh hi a tam tham hle ang. Thu dawnna pakhatin a sawi danin lei dawh tur hi a hmanraw thenkhat phai lamah siamthat tir ani tih a ni ta daih mai a. Kawng an khar chhung hian leidawh hna pawh chu chhunzawm em em lovin an chawl niin hriat a ni bawk.
Hetianga vantlang kawng pawimawh hna khawiha, mipui tan harsatna an siam a, an ngawi mai mai hian a entir chu an hnathawh chhan ber kawngpui hmangtu mipui an zah lohzia a lang a thin a ni.
Mizoramah hian state leh central atanga sum lokal project te hi a thawh zawh hun tura duan saah hian zawh ani ngai lova. Hetianga khawtlai chhan hi chhuanlam tling mang lo, a thawktute hna ngaihsak tawk loh vang leh management lama an tlin tawk loh vang ani fo thin. Dik tak chuan kan state a works department kan neih PWD hi department lian tak, kan state ang state tenau a hna nei tam em em lo thawk tur hian an lian mah mah tih hial an ni thin a. Chuti chung chuan project an thawh reng reng a hun taka zawk awm ngai miah lo pawh hi a chhan leh vang chhui chian a, a tul anga action lak hi a ngai tawh a ni.
Kan sawrkar pawhin project te a huna peih anih theih nan mizoram state projecf monitoring committee a din hial a. He committee hi a hming mai ani nge hna thawk tak tak tura din tih chu tuna tlawng lei dawh a huna zawh lohah pawh hian mipuiin kan lo thlir dawn a ni. State chhunga project te a huna zawh anih ngei theihna turin han che chhuak teh se.