Aizawl: December 7, 2024-a Armed Forces Flag Day lo thleng tur pualin Mizoram Larsap Dr Hari Babu Kambhampati chuan nimin khan thuchah a tichhuak.
Dr Kambhampati chuan Indian Armed Forces-te chu ram lei lung, tuipui leh van lamte venghim tlattu an nih thu sawiin, “He ramin amaha inrelbawl tura dikna leh chanvo a neihte venghim turin an nunna hial pawh an hlan ngam a ni. Ram tana an inpekna hlu tak avang hian keini mipui vantlangte hi ngaihngam takin kan mut theih phah thin a ni,” a ti.
Larsap chuan Mizoram fa hrin armed forces mi leh sa, Mizoram leh India ram tihmingthatute, tun hma lama ex-servicemen hriathlawh leh hmingtha tak takte bakah 9th Legislative Assembly of Mizoramah hian Lt. Col. Clement Lalhmingthanga (Retired) leh Petty Officer TBC Lalvenchhunga (Retired) te chu MLA an ni mek tih a sawi.
Mizoram fa hrin India ram tana an inpekna leh hnathawh that avanga huaisen lawmman leh chawimawina ngaihhlut hlawh tak tak dawngtute a chhuan thu sawiin, Naib Subedar Jeremy Lalrinnunga, Guard Regiment, Gold Medalist, Commonwealth Games 2022 chu Vishist Seva Medal hlan a nih thu te, Naik Lalhmangaihsanga Chinzah, 1st Assam Regiment leh Major Laldingngheta, Madras Regiment-te chu ral hmaah huaisen taka an chet avangin Sena Medal (Gallantry) hlan an nih thu leh, Sepoy H. Lalrokima, 12 Assam Regiment chu ral hmaah huaisen taka a chet avangin Mention-in-Despatch hlan a nih thu tar langin an huaisen leh thiltih avangin heng sipai huaisen leh danglam bikte hnenah hian avaiin Rs 7,53,000 pek an nih thu te a sawi.
“Heng mi hmingtha leh ngaihsan awm tak takte hi infuihthar nana hmanga armed forces zawm tura taksa leh rilru lama inbuatsaih turin Mizo thalaite ka chah duh che u a. Mizo thalaite theihna leh chakna ka hmuh hian Armed Forces hna zawmte pawhin hlawhtlinna changin hmingtha taka an rawn chhuah ngei ka ring tlat a ni,” a ti bawk.
Larsapin a sawi danin financial year hmasa leh tun financial year kal mekah Mizoram sorkar chuan indona avanga sipai hliampui tuara boral chhungte hnenah leh ramtuileiloa chhuakte hnenah Rs 12,50,000 a hlan a ni a. Financial year hmasa leh tun financial year kal mekah Ex-servicemen leh an chhungte mi 30 hnenah avaiin tanpuina Rs 1,58,000 sem chhuah a ni bawk.