Mizo Zirlai Pawl (MZP) buatsaih Zofest 2024 inkhawm vawi hnihna chu nimin khan Chief Minister Lalduhoma’n khuallian niin a hmanpui a, Zofate kan tam a ngai tih sawiin, pun hi sorkar policy a nih thu a sawi.
December 3, 2024 zan dar 7 khan Zofest 2024 hi W. Phaileng ‘Lalbuanga Run’-ah tan niin, hun khatna hman a ni a. Hemi zan hian MZP President H. Lalthianghlima chuan Zofest meichher a det a. Kumin Zofest thupui atan ‘Hrui Khat Vuanin’ tih hman a ni a, December 6, 2024 thleng a awh ang.
Inkhawm vawi hnihna hmanpuitu khuallian, chief minister chuan Zofate tam a ngai a, fa ngah deuh deuh a tul tih sawiin, “Kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei a ni. Pun hi kan sorkar policy a nih avangin nupa, fa pathum leh a aia tam nei chinte hamthatna duan hial kan rilruk,” a ti.
Zofate an inpumkhat deuh deuh tih an hmu tih sawiin chief minister chuan, “Mipuite chauh kan inpumkhat lo va, kohhran thlengin kan inpumkhat deuh deuh a ni. Hman ni lawk khan Mizoram Council of Churches din a ni a, kar hmasa mai khan International Chin Christian Youth Conference, Lawngtlaiah ka va hmanpui a, Lawngtlai district-a kohhran pahnih inzawmkhawm LIKBK ten an inpumkhatna silver jubilee an lawm bawk,” tiin, USA-ah Zo hnahthlak kohhran hrang hrang pakuaten Zofate inpumkhatna lama hma la turin an intelkhawm thu a sawi a. Chin Hills-a kan unaute inpumkhata an awm theih nan a ho ngeiin vawi tam tak an thukhawm tawh thu sawiin, a um zui tur bik pawl pawh an dina, chu pawlah chuan MZP president pawh hi a tel thu a sawi bawk.
Chief ninister chuan ram ro hlu ber chu human resource tha a ni tih sawiin, “Ram leilung hausa takte pawh a chhunga cheng mipuite thiamna leh theihnain a tlin loh chuan ram changkang an ni lem lo. Leilung hausakna nei lo mah se, a chhunga cheng mipuiten an zir miau chuan ram hausa leh thil tithei takah ram tam tak an chhuak si. Chuvang chuan kan thalaiten zirna lo uar rawh u,” a ti.
Lalduhoma chuan, “Mizote hi tunah hian khawvela hnam dam rei lo ber zinga mi kan nih ka ring. |halai thi kan tam ngah lutuk, a bik takin ruihhlo vanga thihna a tam lutuk. Kan insiam that ngei ngei a ngai,” tiin thalaiten ruihhlo hi lo hnar ngam a, a bawihah lut lo turin a chah a. Sorkar pawhin theihtawp a chhuah tur thu leh dan pawh siam that a tum thu a sawi bawk.
He inkhawmah hian Zofest Souvenir, Zawlbuk chu chief minister hian a tlangzarh a ni.
Inkhawmah hian MZP President Lalthianghlima pawhin thu sawiin MZP-in Zofest a buatsaih chhan ber chu Zo hnahthlak unaute inkara inremna leh inunauna tha tundin a ni a. Manipur-ah te, Assam-ah te, Tripura-ah te pawh an nghat kual a, a hlawkna hi a kum telin an hmu chho zel nia a hriat thu a sawi.
Inkhawm hi C. Lalremruata, Vice President, MZP-in a kaihruai a. Chin Baptist Church, USA, Myanmar MP leh Thangram Indegenous People Movement atangin thusawi ngaihthlak niin, Zofa hnam chi peng hrang hrang atang zai leh lam hmuhnawm tak en a ngaihthlak a ni bawk.
Zofest 2024 ah hian, Myanmar, Manipur, Assam, Bangladesh, Tripura, Assam leh USA atangtein palai an kal a ni.