Aizawl: Sorkar laipui scheme ‘Tertiary Cancer Care Centre’ hnuaia din leh sak, cancer damlote tan inzai theihna, ‘Surgical Services’ bultanna Operation Theatres Complex leh hemi ina a ken tel damlo pasarih dah theihna ICU chu Zemabawka Mizoram State Cancer Institute (MSCI)-ah Health Minister Lalrinpuii chuan nimin khan a hawng.
MSCI Conference Hall-a hawnna inkhawmah health minister chuan MSCI-ah inzai theihna leh ICU hawn a ni ta chu lawmawm a tih thu a sawi a. Hei hian mipui harsa zawk tam tak, phai panna tur nei loten nasa takin an chhawr tangkai theih dawn bakah, Civil Hopsital, Aizawl leh ZMC-ah inzai ngai tam tak te chu a chhawk zangkhai thei dawn niin a sawi.
Health minister chuan MSCI-ah Surgery Services hi sorkarin a ngai pawimawh hle tih sawiin, “Mutmawh hnarmawh a neiin, cancer zai thei doctor MSCI a thawkte puibawm theitu nurse leh thawktu dangte dah belh a ni a. Mahse, hengte hi a tlem thei ang ber chauh a ni chungin, Surgery Team hi din a ni a, vawiin kan hawng thei hi MSCI leh Mizoram hriselna dinhmun tihchangtlunna mellung pawimawh tak a ni,” a ti.
Lalrinpuii chuan, PHC-ah te damlo admit an tlem hle a; mahse, District Hospital te erawh mipuiin an bawr hle thung a, chuvangin rural health lamah chuan tha thawhkhat mah se, tertiary sector lam, specialist sector lamah thung chuan doctor leh tunlai hmanraw changkang lamah an pachhe leh viau thung si. Chuvangin, district hospital leh damdawi in liante hi tihchangtlun zel leh thuam that chu sorkarin a ngaipawimawh tih a sawi.
ZMC-a IVF te, lung zaina Cardiothoracic Surgery te, thluak zaina Neurosurgery te tan anih theih nan kawng te dap mek anih thu Minister hian a sawi a. Health Services tihchangtlun nan CSR te hi hman tangkai leh dap zel a pawimawh tih sawiin company tam takten health sector atan an thawk châk thin a, hengte hi an dap zel a tul tih a sawi bawk.
Inkhawm hi Dr. Lalhmingmawii, Director, MSCI in a kaihruai a ni.