Devendra Fadnavis chu Maharashtra chief minister a ni dawn ta a, Ningani hian Mumbai-a Azad Maidan-ah a vawi thum nan lak luh a ni ang.
BJP hruaitute chuan Nilaini khan Fadnavis-a hi chief minister turin an tifel ta a, hun rei tak he dinhmun inchuhna nia sawi thawm pawh a tawp dawn ta.
Party-in chief minister atan an tih hnu lawkah hian MLA thlan tharten an hruaitu atan thlang zuiin nemngheh a ni ta a ni.
BJP kaihhruai Mahayuti tangrualin an state assembly inthlana chiang taka hnehna an chan atanga chawlhkar hnih hnuah sorkar thar a ding dawn ta a. Fadnavis-a hian Governor CP Radhakrishnan chu Shiv Sena chief Eknath Shinde leh National Congress Party (NCP) hruaitu, Ajit Pawar te nen hmuin sorkar a siam theih thu a thlen tawh bawk.
BJP MLA-te inhmuhkhawmnaah Fadnavis-a hian an hruaitu tura an thlang chu a lawm thu a sawi a, MLA 132-te tel lo chuan engmah a ni lo tih a sawi bawk.
Prime Minister Narendra Modi-a hnenah pawh a thlawpna avanga lawm thu sawiin BJP khawpui pahnih sorkarin Maharashtra hmasawnna a thlen tur thu a sawi bawk.
Mahayuti hian MLA 288 awm theihnaah 230 zet an la a. An zinga mi, Shiv Sena hruaitute chuan chief minister ni lai, Shinde-a kaihhruaia hnehna changah inchhalin a thutthleng a luah zui an duh a. Bial 148 an chuha 132 zet latu, BJP chuan chanvo sang ber chu an chan turah an ngai ve tlat bawk.
Shinde-a hian sorkar siamnaah rilru kawi a pu dawn lo tih a sawi a, Prime Minister Modi leh Home Minister Amit Shah ten chief minister atana an tih ang a pawm tur thu a sawi.
BJP hian MLA an ngah avangin Shinde-a kaihhruai Shiv Sena tel lova NCP thlawona ringawt nen pawh sorkar siam thei an ni a, hei vang hian Shinde-a tan hian huaisen taka chanvo sang chuh hi a rem lohna chen a awm bawk.
Hetiang karah hian chanvo sang ber chu an chan tura a ngaih thu a sawi tawh tho va, an hruaitu dangte pawhin Mahayuti-in hnehna an chanah hian Shinde-a chu thlawhhlawk berah an ngai tlat tih an sawi bawk.