Kan sorkarin inrenchem lam a buaipui nasa a. Sum leh pai haichhuah belh dan tur dapin resource mobilisation committee thlengin a din chho ta ut ut a. Kan retheihzia hria a hetiang a hmalakna hi a lawmawm a. Kan ram pawh sum leh pai dinhmunah zawi zawiin kan that chhoh beisei phawt ang.
Amaherawh chu sorkarin sum leh pai dinhmun siamtha tura a hmalakna erawh a fimkhur a ngai hle dawnin a lang. Mipui retheihna hrerenga ke pen turin tan la sela. Mipui te hi kan retheih dan a namai tawh lo a. Sorkar hnathawk chhungkua ni lo, sumdawng ni bawk si lo tan chuan sum lakluhna hi a vang em em a. Lakluhna tur a awm miau si loh chuan kan ro tlawk tlawk vek a. A bik takin pawisa lengvak tlemna thingtlang lam phei chu in 300 khuaah vawk pumkhat an ser pawhin lei zo tur an awm lo ta thin a ni. Mipui retheihna hi kan ram hruaitute hian an hre viau ang chu maw?
Tunlaiin mi thenkhatin chhiah lak tam tur thawm te an sawi ri zeuh zeuh a. Mipui tan sorkar thar hi lo lawm viau tur nge lungngaih tur tih hriatthiam a har tan ru hle. Mipuiin chhiah pek hi chu kan tih tur, kan leibat a ni a. Amaherawh chu tun dinhmunah chuan chhiah lak tih punna tlak hi kan ni meuhin a lang lova. Mizoram pum pui land survey neih a, in nei tawh phawt chu mi zawng zawng an hmun tehfel sak a, lei man bithliah tihsan te sawi rik a lo awm leh ta. Hei hi thil huphurhawm a tling. Chuvangin kan sawrkar hian sum leh pai tuakah thahnem a ngai deuh a nih pawhin mipui hi chu min la hlahthlem rih deuh se a va lawmawm dawn em. Sum tuakna hi mipui phurrit ni lo hram se.
Sum tuakna tur hian kan sorkar hian a nei leh la lut tam lam hi melh hram hram se. Aizawl khawpuia sumdawnna chi hrang hranga chhiah chawi lova sumdawnna pawh hi enfiah ni sela. A nihna tur anga chhiah lak theihna zawng zawng dap sela, lâk awm takah hi chuan dim em em lova chhiah lak mai hi a finthlak ngei ang.