Aizawl: Zo Re-Unification Organisation (ZORO)-in an buatsaih Zo Indigenous Indentity Card chu nimin khan Assembly Speaker Lalbiakzama’n a tlangzarh.
Assembly Speaker room-a tlangzarh inkhawmah Lalbiakzama chuan Zofate hi UNO chuan indigenous peaple-a a pawm tawh tih sawiin, “UNO hian indigenous people hi a ngai pawimawh hle a. UNO chuan hnam lian zawk leh chak zawkten an awpbeh mek indigenous people-te chhanchhuah an nih theih nan UN Declaration on the rights of people chu kum 2007 khan a lo siam tawh a. He UN Declaration hi keini a indigenous people-te chuan kan hman tangkai thiam a tul hle a ni,” a ti.
Zofate hian an awmna ram theuhah nasa tak an tawk mek tih sawiin Lalbiakzama chuan, “Unau leh unau kan inbeih chang pawh a awm a, kan inlungrual a, kan tanruala kan hneh mai theih kan hmelmate pawh kan hneh lo fo thin a ni,” tiin, khawvel a an dinchhuah ve theih an tanruala an inlungrual a ngai tih a sawi.
Lalbiakzama chuan ZORO-in UN thupuan – UN Declaration on the rights of people’s behchhana Zofa Indigenous people tana hman tur ‘Zo Indigenous Indentity Card’ an siam hi tha a tih thu leh, he ID hi Zofaten an dikna chanvo an chan theih nan tangkai taka hman a nih a rin tlat thu a sawi bawk.
ZORO General Secretary L Ramdinliana Renthlei chuan card sawi fiahin, “UN thupuan – UN Declarations on the rights of Indigenous Peoples-in kan dikna chanvo min pek tualto hnamte, a bik takin khawvel sorkar ramri khamin a thendarhte chu an inkalpawhin an inlaichinna tinghet tur leh intanpui tawn a tul pawhin an intanpui ang a, sakhaw thil leh khawtlang thil, ei leh bar leh politics-ah te anmahni mi leh sate nen inpawh a, inpawlho theihna dikna chanvo an nei, min tih angin kan dikna chanvo min siamsak kan zawmna tur atan a tangkai dawn a ni,” a ti.
“Zo Indigenous Indentity Card hian kan nihna a tichiang dawn a, ID nei apiangte chu khawvel ramri khamin a then Zofate India, Burma leh Bangladesh a awmte zalen taka inkalpawh a tiawlsam thei ang. Tin, Zofate hi UNO hnuaia Indigenous Peoples Organisation (IPO) kan ni tih tilang chiangtu a ni a, Indigenous Peoples kan nih anga UNO-in chanvo min pekte kan chan theih phah dawn a ni,” a ti bawk.
ZORO thuchhuahin a tar lan danin, Zo Indigenous ID hi UNO hriattir a ni dawn a. Hei bakah, India, Burma leh Banngladesh sorkar hriattrir a ni ang. India sorkar lehkha pek hi Mizoram, Manipur, Assam leh Tripura sorkar a copy pek a ni bawk ang.
Zo Indigenous ID hi a siam man Rs.100 a ni a, a form hi ZORO office-ah lei tur a ni a, a form fill-up zawha thlalak nen theh luh tur a ni. ZORO chuan Zofate zawng zawngin Zo Indigenous ID hi siam vek turin an sawm.