Mizoram Finance & Account Association Annual Conference hmanpuitu khuallian, Chief Minister Lalduhoma chuan inrenchemna lamah assembly legislator-ten bul an tan tih a sawi.

Nimina Aijal Club-a hun hmanah finance minister ni bawk, Lalduhoma chuan inrenchemna lamah assembly legislator-ten bul an tan tih sawiin, “Kan hamthatna kan titlem a, official-te an inren zui a. Vawiina MLA leh minister-ten hamthatna an dawn mek hi party tin aiawh MLA-te telna, Assembly General Purpose Committee pawmpui a ni,” a ti.

Chief minister chuan finance leh planning lam a that loh chuan sorkar sum kalphung leh hmalakna a kal dik thei thin lo tih sawiin, “An pahniha an chak hi a ngai thin. Chuvang chuan, sorkar hian a ngai pawimawh a, hun reilo te chhungin finance leh planning lamah hian thil inthlakthleng duhawm tak tak kan hmu tawh a ni,” a ti.

A tlem thei ang ber sum puk nise an tih thu sawiin finance minister chuan, “State matching share nei sang chi scheme pawh hi a theih hram chuan i pumpelh ang u. Overdraft lo va kal hram kan tum a, K-deposit pawh tihtlem ni se kan ti. K-deposit hian financial year kal meka kan sum hmuhte a ei hek ve zel vang a ni,” tiin, an enkawl zawh tawk project chauh la a, scheme a awm vang ringawta bawhzui lovin ramin a mamawh dan zawk lal se an tih thu a sawi.

Kalphung tharah sorkar hnathawkte eirukna lakah an fihlim ngei ngei tur tih sawiin chief minister chuan, “Nangni kan finance officer-te phei chu in dik mai a tawk lo, mi dangin mi dik in ni tih an hmuh a ngai. Sorkarin hnathawk a lak hian human resource investment a nei tihna a ni a, kha hnathawktu kha sorkar tana thawk chhuaktu tangkai a nihzui ngei a ngai,” a ti.

Inkhawm hi Vanlalsawma, President, MFASA-in a kaihruai a. Chief minister chuan MFAS member thar 10 a lawm lut.

He huna tar lan a nih danin Mizoram Finance & Account Service Rules, 2021 angin post (cadre strength) hi 92 sanction an ni a, chung zinga 62 chu luah mek niin deputation post hnih leh ex-cadre post pakhat an luah bawk a, hna ruak hi 30 a awm mek a ni.

CM thu sawi dangte

1. Local audit kan tichak a, kalphung tha zawk a awm theih nan special audit te kan kalpui a, central sorkarin local body grant te pe chhuak tura online audit a phut avangin hun rei tak grant hi kan lo dawng tawh lo va. Hei hi kan bawhzui vat a, Delhi-ah te ka zu sawi bawk a. A hnu lawkah Rs. 35 crore min rawn release sak ta a. Kumin chhung ringawt hian VC leh LC tana 15th Finance Commission Grant hi vawi thum ngawt, a vaiin Rs. 105 crore kan hmu tawh a. Kum 2022 hnua kan hmuh lehna hmasa ber a ni.
2. Kan budget hmasa ber hi kan dinhmun dik tak tarlang thei tura duan a ni a. Kan data neih ten duhthu erawh an la sam chiah lo. Data dik tak neiha kan nihna dik tak hriat hi tul kan ti a, data dik neih kawngah hmasawn zel kan tum. Budget proposal siam hun kan lo thleng leh der tawh a, budget dik (realistic) tak kawng hi department tinten i zawh ang u. Budget lang mawi tak, kan nihna ni lo deuh si an hmuh khan kan lan that hmel a. Revenue Deficut Grant kan hmuh hniam phah thei. Political Advantage atana lan that ai chuan kan nihna dik tak kan lantir khan ram tan a hnemhnanpuiawm zawk a ni.
3. Healthcare bill ba te, MR bill ba te tihfel kan tum zel a. GPF pawh Minister sawisak (recommend) kher lo va pek thin ni se kan ti. GPF leh pension hamthatna dang te hi kan pe chhuak hnem tawh hle. Sawrkar hnathawk hlawh hi a hma thei ang bera pek zel tumin kan bei fat fat thin. Power bill ba pawh chinfela, pe tha lawmman (rebate) lak theih zel kan tum a. Lak pawh kan la a. Mahse bill hlui tak tak a la rawn thlen belh zel rih. Department dangah pawh leiba tihfel tur a la awm nual.
4. Sorkar hnathawk hlawh hi mi tam tak ei leh bar innghahna a nih avangin officer chak lo bik leh tuanmuang fal awm lo va lo buaipui vat vat turin ka ngen che u a ni. Central scheme behchhana hlawh la te hian harsatna an tawk nasa thin a. A chin fel dan kan ngaihtuah ho a tul hle.
5. State sum leh pai dinhmun siam tha turin kan tang hle a, theihtawp min lo chhuahpui ang che u. In awmna theuhvah Financial Rules lo tungding rawh u.