Aizawl: Tourism Minister Lalrinpuii chuan kalphung thar hnuaiah toursim lamah hmasawnna thar a thleng mek niin a sawi.
Sialsuk khua chuan India ram pum huapa Best Tourism Village, Community Based, 2024 lawmman an dawn chu nimin khan khawtlangin ruai nen an lawm a. He hun hi tourism minister chuan khuallian niin a hmanpui a. Sialsuk khuain India ram pum huapa lawmman a dawng thei chu khaw mipui leh khawtlang hruaitute thawhhona that vang a nih thu sawiin, chhuanawm a tih thu a sawi a. Sialsuk khua chu khualzinten tlawh an châk bucket list-ah telh a nih ngei theihna tura theihtawp chhuahpui turin khawtlang mipuite chu a sawm nghal.
Kalphung thar hnuaiah tourism lamah hmasawnna thar a thleng mek tih sawiin minister chuan, “Event huaihawt lamah pawh mipuiten hma hruaiin, sorkar chu a fual lai dawmtu (facilitator)-ah zawk a tang chho mek a ni. Event-te pawh sorkar department-in huaihawt tawh lovin tender hmangin mi thiam zawkte hnenah outsource a ni tan,” a ti.
Sialsuk Village Council President R Lalruatkima kaihhruai inkhawmah khualzahawm Baryl Vanneihsangi Tlau, Aizawl South III bialtu MLA ni bawk pawhin thu a sawi.