Aizawl: Art & Culture Minister C Lalsawivunga chuan Mizo history kimchang taka chhui tuma hmalak mek a nih thu a sawi.
Ningani khan Pachhunga University College-a Mizo History Association conference cum seminar neihah khuallian C Lalsawivunga hian a hmanpui a. Mizo history ziaka awmah hian thil thenkhat kimchang lo deuh awm nia a hriat thu a sawi a, mi hmasate fakawm a tih rualin ziaka hmuh tur awm vak lo thil thenkhat chu chhui chian leh ziaka dah ngei tul a tih thu a sawi.
C Lalsawivunga chuan, “Kan Sailo lal zinga thlang tla hmasa, Laltuaka te chanchinte hi ziakin hmuh tur a tlem a. Pachuau, Fanai, Hualngo lalte pawh kan nei ve a, an chanchin ziaka hmuh tur a awm mang lo,” tiin, kimchang taka history ziak a nih theih nan leh history chhuituten harsa lutuk lo a, history hmun pawimawh an tlawh theih dan tur ngaihtuah te a rilruah chuan a awm thu a sawi.
Mizo history chhuina atana sorkarin hma a lak thu leh Delhi-ah an bawhzui thu sawiin, “Nuai 200-te a awm theih chuan historian-te tan pawh hmun pawimawh tlawha zinte pawh harsa lutuk lo turah kan ngai,” minster chuan a ti.
Annual conference cum seminar-ah hian an Mizo history chhuitu hriat hlawh tak, Liandova, Letpanchaung, Myanmar chuan ‘Lusei Hnam Kalphung Chanchin’ tih thupuia hmangin special lecture a pe a, an pawl president Prof. Sangkima’n ‘Contributions of R. Vanlawma (1915-2006) to the People of Mizoram’ tih thupui hmangin presidential address a nei bawk.
MHA hi 1980-ah din niin kum tin khawmpui neih pahin seminar an nei thin a, Annual Conference cum Seminar tiin an vuah a, kumin hi a vawi 44-na a ni a. Kuminah hian Mizo history chungchangah paper 25 an zirho dawn a, December 6, 2024-ah thleng a awh ang.
Seminar-a paper hrang hrangte hi Historical Journal Mizoram tiin a bua chhuah leh thin a ni a, nikuma an paper dahkhawmna Historical Journal Mizoram, Volume XXIV chu khuallianin a tlangzarh a ni.