Aizawl: West Phaileng-a neih mek, Zofest 2024 ni hnihna chu nimin khan RD Minister Prof Lalnilawma’n khuallian niin, Zofate inunauna tihngheh zel a nih theih nan tawngkam hman fimkhur a ngaih thu a sawi.
Zofest ni hnihnaah hian hnam hrang hrang aiawh an zai bakah an hnam lâm an entir a. Manipur-a chi leh chi inkara buaina avanga Zofa unaute pasaltha boral mi 12-te sunna hun hman niin ngawi rengin minute khat an ding.
Khuallian Prof Lalnilawma chuan thu sawiin, “Zofa hnam chi peng hrang hrangte hi kan inpumkhat zel theih nan, kan inunauna tichhe thei zawnga tawngkam hman hi a pawi thei hle,” tiin, Zofate inunauna tingheh zel a nih theih nan tawngkam fimkhur a ngaih thu a sawi.
Zofa chi peng hrang hrangte hian anmahni awmna hmun theuhah mahni hnam bil politics khelh nat lutuk avang hian an inlungrual lo fo tih sawiin, “Hnam bil dinkhawchhuahna aiin Zo hnam anga kan dinkhawchhuahna tur buaipui ila kan inlungrual ang,” a ti.
He hunah Adviser to CM Lalmuanpuia Punte chuan ‘Hrui Khat Vuanin’ tih thupui sawiin, “Zofaten kil hrang hrang atangin beih kan tawk nasa hle a, hetiang hi kan dinhmun a ni chung pawha kan inlungrual hlei thei lo hi chu a hahthlak hle a. Hrui khat kan vuana, kan tan rual vat lo a nih chuan kan darh vat ang,” a ti.
Chawhnu lamah, Zofest thupui sawihona ‘Pum titi’ neih niin, Zofate inlungrualna tur leh hrui khat vuana thawhho dan turte palaiten an sawiho a. He hunah hian resolution an siam bawk.
Resolution an siamte:
- India, Burma, Bangladesh leh ram hrang hranga Zofa awmte hi thisena unau, thlah khat kan ni a. Ramriin min thendarh mah se, hnam nunphung inang, ze inang, rinna thuhmun kan ni.
- Vawiinah hian ramriin min thendarh rih mah se, engtik niah emaw chuan ram rorelna pakhat hnuaiah kan la awmkhawm ang tih kan ring tlat a ni.
- Zofate tuna kan awmna ram theuhah, khua leh tui tha ni turin kan infuih a. Harsatna leh buaina kan tawh hunah inpuih tlan zel tha kan ti.
- MZP-in Zofate kan insuihkhawm theih nana a hmalakna hi kan thlawp a, theih ang angin kan tawiawm zel ang.