Chief Minister Lalduhoma’n Assam Rifles chhuahsan tur ram chu tunah hian a ram tehin joint survey an nei mek a, khauh takin an humhalh dawn tih a sawi.
Centre for Environment & Social Justice (CESJ)-in Assam Rifles ram chhunga thing chhiarpui leh an zirchianna behchhana lehkhabu an buatsaih, ‘Tree Inventory & Carbon Storage of Assam Rifle Campus, Aizawl, Mizoram’ lehkhabu chu chief minister hian Inrinni khan Hyve Aizawl City Hall-a a tlangzarhnaah khawvelin sustainable development a ngai pawimawh tawh a, hmasawnna hna thawhte hi khuarei daih leh leilung tichhe lo thei ang ber an ni zel tawh a. He kawng hi an zawh ve a ngai tih an hria a, theihtawp an chhuah dawn tih a sawi.
Lalduhoma hian khawvel thang zelah hmasawnna an duh a, hmasawnna hnate hian environment a nek bawk si avangin hmasawnna man pek hi a ngai ve tih hriat a that thu sawiin, an kal dan tur tinrengah an inrawnkhawm zel dawn tih a sawi.
Chief minister hian Aizawl khawpui atanga Assam Rifles sawn chhuah tur chungchangah hmalak mek niin, tunah hian a ram tehin joint survey an nei mek a, ram hi khauh takin an humhalh dawn tih a sawi bawk.
CESJ lehkhabu tlangzarh inkhawmah hian Forest Minister Lalthansanga leh CESJ Working Chairman Vanramchhuangi te pawhin thu an sawi.
Assam Rifles ram chhunga thing chhiarpui leh zirchianna hi MZU-a Department of Forestry Research Scholar pahnih, PC Zothanpuii leh Michael Lalramdingliana ten an nei a. An zirchiannaah ram hi 16.9 Ha-a zau a ni a, thing chi hrang chi 480 a awm a. International Union for Conservation of Nature te tehfung atanga riral hlauhawm tak venhim ngai bik thing chi li an awm a, riral hlauhthawnawm pakhat leh dinhmun ngaihtuahawm panga an awm a. An zinga 71 hi ramhmul damdawia hman theih leh ei theih chite an ni.
He hmun hian carbon dioxide (CO2e) 5766.73 bawr vel a hip lut tih hmuhchhuah a ni.