Khua a vawt vur mai a. December thla laihawl kan thleng dawn ta. Mi tam tak rilruah chuan Krismas lo thleng tur ringawt a awm tawh ngei ang. Engtinnge he hun ropui leh hlimawm hi ka hman ve ang tih ngaihtuah chu thalai zinga a tam ber kan nih hmel bawk.
Krismas hlutna ngaihtuah chungin he hun hi kan hmachhawn dawn em? Kan tana thihna hmachhawn tura a lo pianna ni tihte ngaihtuah thleng phak kan nih loh pawhin he hun hi mite tana malsawmna chhete tala ka nih ve theihna hun a ni tih tal ngaihtuah thlen hi a va pawimawh em.
Thawmhnaw thar neih a, thiante nena hlim taka kan hman lai hian vanduai retheih avanga he hun lo thleng tur huphurh em ema lo thlirtute rilru hi kan hriatthiam pui tel a va tul em. Nanga tana hun hlimawm hi tam tak tan chuan hmachhawn huphurhawm a tling asin.
Ngaihtuahna chhungril han seng la. He hun hlimawm hmang tur hian nangmah ni lo tu emaw tal tan rilru manganna chhawktuah tan ve i chak lo maw? Krismas a hlimhlawp atana i sum senral atang khan tlemte tal, zaa sawm tal rethei leh vanduaite tan han thehchhuak la nangmah pawh i Krismas hman a nawm zawk a rinawm tlat a nia. Mite hlim nana tanpuina pek chhuah vanga rilru hrehawm ai chuan, mite tana luangchhuak hian hun an hmang nuam zawk thin tlat. Hun hmang nuam tur chuan mahni rilru hi a nawm hmasak a ngai a. Tute emaw tana i in hawn khan inkharkhip ai chuan i hlim ngei ang.
Mahni mai hi chuan tute nge harsatna tawk a, tute nge Tanpui ngai hriatte pawh hi a har thin. Mahse, he hun atana tanpuina lo ngaihtuahtu mi tam tak an awm thin. Chung mite kaltlang chuan malsawmna nih hun hi i hmaih lo hram ang u khai.