Aizawl: December 10 – 15, 2024 chhungin Serchhipah International Paragliding Accuracy Championship & Air Sport Festival 2024 neih a ni dawn a, hemi rual hian Paraglider te tumna tur landing site, Zawlpuiah Nghakuai Khai Runpui neih a nih dawn bakah silai inkahsiak buatsaih a ni bawk ang.
He festival tawpni ah Chief Minister Lalduhoma leh Tourism Minister Lalrinpuii ten an hmanpui dawn a, tlaiah concert nen khar a ni ang.
December 9, 2024 hian pilot-te tan inziah luhna hun leh a tul tul inbuatsaihna hun neih a ni ang a. December 10-ah inelna neih tan a ni ang a, Serchhip DC Paul L.Khuma chu khuallian niin he hunah hian pilot intihsiaka telte a vai liam (flag off) dawn a ni.
Tun dinhmunah Federation Internationale Aeronautique (FAI) kaltlangin ram 14 atangin pilot 79 an in-register tawh a. Mikhual pawh an thleng kim thawkhat tawh a. A chhimtute tan paragliding tandem flight neih tan a ni tawh a. Hot air balloon a chuan theih a ni dawn bawk.
Air Sport Festival neih chhung zawng hian ei tur chi hrang hrang te, handloom te, thei leh thei tui te, dil sangha man thar leh thil dang zawrhna tur stall 15 siam a ni.
Serchhip District Fisheries Development Office leh Serchhip Dist. Fish Farmers Assn (SDFFA) te tangkawp buatsaihin, paraglider te tumna tur landing site, Zawlpuia Nghakuai Chiah Runpui buatsaihna hmunah hian a fal deuhvin Fisheries Department Stall a awm dawn a, hetah hian sangha man thar hlim tuihnai tak tak te, bawngsa, arsa leh vawksa fry te ei tur a awm dawn a, a bul lawkah silai Inkahsiak a awm bawk ang.