Jaish-e-Mohammed chief Masood Azhar-a’n zalen takin Bahawalpur-a vantlang inkhawmah thu a sawi tih thawm a rik hnu lawkah India chuan a lakah Pakistan chu na taka che tura a duh thu a sawi ve nghal.
External affairs ministry thupuangtu, Randhir Jaiswal-a chuan he thil sawi awm hi a tak tak a nih chuan Pakistan hian ‘thu a veivir vel’ chu tichiang se a duh tih a sawi.
“Azhar-a laka na taka chet leh dikna hlen chhuah hi kan phut a ni. Pakistan-ah a awm lo tih phatna tur a awm tawh lo,” a ti.
“Thu a sawi tih hi a dik a nih chuan Pakistan thu phuahchawp a lang tihna a ni a. Azhar-a hi ramri kânin India beitu firfiak a ni a, a laka na taka chet kan duh a ni,” a ti bawk.
Jaiswal-a hian kar tina thuthar lakhawmtute a kawmnaah Azhar-a laka Pakistan tih tura India-in a phut hi Zirtawpni khan a sawi a ni.
Azhar-a hi kum 20 chuang hnua a vawi khat nan JeM mite hmaah thu a sawi a, an pawl digital platform-ah Thawhlehni khan tar lan a ni.
The Print chanchinbu chuan Azhar-a hi kum 1924-a Turkish lalram a tluk chhiat kum 100-na puala thu sawi niin a tar lang a; India leh Israel laka na taka chea khawvel huapa chea Islam ram din tura hma lak tur a nih thu a sawi niin an tar lang.
JeM chuan Azhar-a thu sawina hmun leh hun hi an tar lang lem lo va. An pawl digital platform-te chuan a thu sawi hi an lo tichhuak zauh zauh tawh thin a, tuna mi erawh Gaza-a indona thleng mek chungchang a sawi an tihchhuahna hmasa ber a ni.
Indian intelligence official pakhat chuan Azhar-a thu sawi hi thla hmasaa Umm-ul-Qura seminary & mosque complex, Bahawalpur bul, Pakistan a nih theih thu a sawi.
Acre 1,000-a zau hmunah hian administrative block leh in tam tak a awm a. Azhar-a hi JeM pek pakhatin kum 2003-a Pakistan sipai roreltu thin, General Pervez Musharraf-a thah an tum avang khan vantlanga a inlan khap a ni.
Hemi hnu hian kum 2001-a mi firfiakten Indian Parliament an beih thu kal zelah man a ni a, hrem a ni lo thung a. Kum 2016 khan Pakistani thuneituten ‘venhimna hnuaia awmtir’ a nih thu an sawi.