Aizawl: Mizoram State AIDS Control Society (MSACS) leh District AIDS Prevention & Control Committee (DAPCC), Lunglei District tang kawp huaihawta World AIDS Day 2024 pualin hun hmanah, khuallian Health Minister Lalrinpuii chuan Mizoramah nikum (2023-2024) chhung khan HIV kai thar mi 2,059 hmuhchhuah an nih thu a sawi.
Covention Centre, Lunglei-a hun hmanah Lalrinpuii chuan, kum 1990 atanga chhinchhiah danin Mizoram chhungah HIV positive mi 28,028 an awm tawh thu leh nikum 2023-24 chhung khan HIV kai thar mi 2,059 lai hmuh chhuah an nih thu a sawi a. Lunglei district huam chhungah (Hnahthial district telin) kumin January atanga October thlenga thisen endik 4,997 zinga mi 99 (1.98%) lai chu HIV positive an nih thu a sawi bawk.
Health Minister chuan HIV/AIDS chu ‘Nungchang Kaihhnawih Natna’ tia sawi thin a nih thu leh HIV hrik pai hmuh chhuah tawh zawng zawng atanga zaa 93 aia tam zawk chu invenna tel lova mipat hmeichhiatna hman atang leh hriau leh inchiuna hmanraw thianghlim lo inhman tawm atanga kai an nih thu a sawiin, “Hei hian HIV chu inkai chhawn theih natna ni mah se, inven theih a nihzia a tilang chiang hle a ni,” a ti.
“Mizoram chu HIV inkai chhawn theihna leh a invenna kawng hriatna lamah India rama hre tha ber pawl kan nih laiin, mipui cheng zat azira a kai tam lamah India rama sang ber kan ni a, HIV kaina kawng leh inven dan kan hriatte kan zawm that loh vanga kai tam kan ni tih a lang,” a ti bawk.