Aizawl: Congress thalai MPYCC chuan ni 100 inhlawhna, Mahatma Gandhi NREGA (MGNREGA) chu thingtlang mite a batsat mek chu pe chhuak nghal turin ZPM sorkar an phut.
Nimina an thuchhuahah MPYCC chuan, kum tin sorkar laipuiin India rama thingtlang mite, thiamna nei lo kut hnathawh leh a kaihhnawih thila thawk tura inpe chhungkaw tinte hnena ni za tal hlawh neia an hnathawh theihna tur sum batsak mek an ni chu, mipui sorkar siam tura inzuar ZPM party-in mipui a zah lohzia leh a palzutna chiang takah an ngaih thu an tar lang.
ZPM sorkar hian thingtlang mite inhlawhna, October 13 – November 13, 2024 inkar, ni 26 chhung hi a rang lama pe chhuak tur leh, December ni 7, 2024 chhuak, tun laia an thawh mek pawh natsat loa pe tla nghal turin an phut tih an sawi a. Kristian te hunpui Krismas bazar-na kawngah pawh harsatna Mizoram hmun tam takah an tawh avangin, ZPM sorkar hian chhuanlam siam lova pe chhuak nghal turin an ngen tih an tar lang bawk.