Aizawl: Mizoram Journalists’ Association, Mamit District chuan nimin khan sorkar pisa eng emaw zat surprise visit an nei a, zing dar 9:30 atanga dar 10 thlengin office eng emaw zat an kal chinah, officer biak tur an awm lo deuh vek a. Office thenkhat phei chu thawktu takngial pawh la kallo, chawkidar in office a hawn ringawt an awm nual bawk.
Mamit district chhunga khaw hrang atanga office dawr turten chawlhkar tir leh kar tawpah officer dawr tur an awm tawh loh thu an sawi chu, MJA Mamit District te chuan thil awmdan bawhzuiin sorkar pisa surprise visit hi an nei a. Office hrang hrangte la tlawh chhunzawm zel an tum a ni.
MJA-ten Mamit khawpui chhunga office-te an tlawhkual zingah Kai apps (HOM) hmangtute chuan pisa an kai hma deuh a; mahse, head of office-te erawh pisa kai an awm lo thung.
Heng HoD zinga thenkhatte hian Aizawl leh hmun dangah Pathianni hmangin an kal thin a. Thawhtanniah office dawr leh training chhuanlamin an châm khawmuang tlangpui thin nia hriat a ni.