Aizawl: Chief Minister Lalduhoma’n nimin khan 1st Bn MAP Ground, Armed Veng-a Mizoram Police Sports Meet chu khuallian a hawng a, police hna ruak eng emaw zat hnawh khat turin hma an lak mek thu a sawi.
Chief minister chuan police hna chu taksa leh rilru hrisel neite thawh chi hna a nih avangin police ni turin physical test leh exam paltlang a ngai a. Luh hnuah training hautak tak neihpui leh an ni tih a sawi a. Service hnuah pawh ngaih pawimawh zui zel niin police sports meeting pawh hian chu chu a tum tih a sawi.
Infiamna lamah police-te hian Mizoram an tihmingtha thin tih sawiin Lalduhoma hian, “Tun hnai lawkah pawh C. Lalruatkima, 1st Bn. MAP chuan Asian Open Police Taekwondo Championship-ah gold medal a la a. Ka social media platform-ah te ka lawmpuina ka ziak nghe nghe. Kan sorkarin kan ngaihsak che u tih hi a takin kan lantir a, in transfer TA leh hamthatna dang, hun rei tak lo tang tawhte kan release nasa a, rifle allowance pawh kan tipung a ni. In indaih lohna pawh kan hria a, hna ruak eng emaw zat hnawh khat turin hma kan la mek bawk,” a ti.
Ram changkangah chuan mipuiten police an zahin an ngaisang thin tih sawiin, “Naupangte pawhin police nih te, fire fighter nih te an châk thin. An police-te entawntlaka an nun vang te, khawtlang tana hna tha an thawh tlat vang te a ni. Mizoram police-te pawh hi entawn tlak ni tlat ang u,” tia sawiin, nunphung dik lo vanga natnain a tibuai nasa lutuk ni tea lang chu an insiam that a ngai hle tih a sawi.
He hunah hian Home Minister K Sapdanga chu khual zahawm niin, Anil Shukla, DGP leh Patron chuan thu a sawi bawk.