Aizawl: School Education Minister Dr. Vanlalthlana chuan sorkar sikulte chu fate luhtir theihna tur khawpa siam tura tan lak a tul tih a sawi.
Nimin khan Dr Vanlalthlana hian SCERT Seminar Room, Chaltlangah zirlai puitu ‘Thiamna Thûl’ (Jaduui Pitara) a tlangzarh a. India hmarchhak state-te zingah Mizoram chu Thiamna Thul hmang hmasa ber a ni.
Tlangzarhnaah Dr. Vanlalthlana chuan thingtlang kilkhawr thlenga sikulten an hman theih tur ‘Thiamna Thûl’ tlangzarh a ni ta chu lawmawm a tih thu a sawi a. Naupangten an zirlai theuhte a bulthut atanga tha taka an man theih nana tan lak a tul thu sawiin, “Sorkar sikulte chu fate luhtir theihna tur khawpa siam tura tan lak a tul a ni,” tiin, school leh syllabus-te pawh naupangte hip tur khawpa siam a ngaih thu leh rawngbawlna a nih thu leh, MLA te chu an bial theuhah School enkawl bik nei theuh tura ngen a tum thu a sawi bawk.
Lalduhawmi Thomte, Joint Director, School Education Department chuan National Curriculum Framework duh dan angin naupangte tan zirna chu infiamna behchhana siam tuma ruahman a ni a, chumi atan chuan Thiamna Thûl hi ruahman a lo nh tak thu a sawi.
Thiamna Thûlah hian naupangten kuta an khawih leh hman theih tur te, hmuhnawm tipaha an zir theih tur item chi hrang 30 dah a nih thu leh naupangten kum 3-8 chhunga an zir hi an nunah a bei nghet a ni tih research atanga hriat a nih thu te, hemi behchhan hian thiamna thûla hmanrua chi hrang hrang dahte hi naupangten zirna bulthut an thiam nana ruahman a nih thu, Lalduhawmi Thomte hian a sawi bawk.