Mizoram Pradesh Congress Committee (MPCC) chuan nimin khan Vana Pa hall-ah Special Assembly an hmang a, an president, Lal Thanzara chuan kum 2028 MLA inthlanpuiah Congress an sorkar leh a nih chuan economic chhanchhuahna programme rintlak, NLUP chu mi thiam zawkte rawnin changtlung zawkin an kalpui leh ngei dawn tih a sawi.

Lal Thanzara chuan Congress hian kan ramah ro an rel rei ber a, development pawh Mizoram tan an thlen hnem ber tih sawiin, “Heng kan ram rohlu – airport, medical college, Thenzawl Horticulture College leh sports infrastructure hrang hrangte hi Congress sorkar hun laia thawh a ni,” a ti.

Congress sorkar khan mi retheite hlim leh thlamuang taka an awm a duh ber thin tih sawiin Lal Thanzara chuan, “Kum 1990 chhovah khan mi rethei rangva inchung nei pha lo tam takte tan rangva inchung tur kan sem a, 1993-ah NLUP Rs 30,000-in chhungkaw 41,000 hnenah bultanna tur kan sem leh a ni. MNF-in kum 1998 leh 2008 inkara ro an rel chhung khan MIP an kalpui ve a, a hlawhtlinna hmuh tur a awm lo. Kum 2008 atanga 2018 inkarah khan Congress sorkar chuan NLUP kan kalpui leh a, chhungkaw 1,31,940 hnenah pek a ni,” tiin, NLUP vang hian arsa, vawksa, bawngsa, bawnghnute, sangha, buh leh thlai, artui etc. thar chhuah nasa takin a pung a. Khawl chi hrang hrang, industry-a hman tur leh lei lehna khawl thlengin an sem tih a sawi.

New Economic Development Policy hnuaiah thalaite bultanna kailawn, startup scheme bultan a ni tih sawiin, “Vawiin thlengin thalaiten an hmang tangkai em em a. Vawiina Mizoram lo thang chho zel pawh hi khami hun laia kan hnathawh zar kha a ni. Hengte avang hian pawisa lengvak a tam a, bank tam tak Aizawl khawpuiah an rawn lut a, chawhmeh zuar leh sumdawngte pawhin nuam an ti,” Lal Thanzara chuan an sorkar lai apiangin mipui an hlim tih a sawi.

MPCC president chuan tuna ZPM sorkar hrawn mek hi an insawi angin an kal lo tih sawiin, “Inrenchemna kalpui anga insawiin tul lovah hna an siam belh avangin vaibelchhe sawm tel an sen belh mek a. MLA Fund-te tul lovah an tisang a, kum tin vaibelchhe 80 lai an seng dawn a ni. An flagship programme-te hi anmahni duanchhuah a ni lo va, central scheme awm sa a ni,” tiin, Hand Holding Scheme hi mi nawlpui, lehkhathiam lo leh pianphunga rualbanlote tan chuan tum chhin chi pawh a nih meuh lo, thiamna neih ngai, project siam ngai a ni zel tih a sawi.

Lal Thanzara chuan, “Kum 2028 inthlanah Pathian leh mipuite zara Congress party kan sorkar leh a nih chuan oil, buhfai leh chhiah uchuak taka an tihsan hi kan ennawn leh vek dawn a, economic chhanchhuahna programe rintlak NLUP hi, mithiam zawkte rawnin changtlung zawkin kan kalpui leh ngei dawn tih ka puang e,” a ti.

Special Assembly hi Sr Vice President Lalnunmawia Chuaungo-in a kaihruai a. Congress party member boral tate sunna hun hman a nih bakah president kaihhruaina hnuaiah rorel inkhawm niin resolution pariat an pass.

MPCC Special Assembly Resolution

1. Kan ram leh mipuite kaihruai turin thinlung taka Pathian tih mi hruaitu kan mamawh ber tih Congress Party chuan kan pawm a. Kan ram leh mipuite hruai turin Pu Lal Thanzara, MPCC President hi kan ring tawk a, Mizoram Congress member ten kan thlawp tlat zel dawn a ni.
2. India rama keini ang hnam tlem leh hnufual zawkte humhima kan awm nan leh hmasawnna kailawna kan kai ve theihna tura ruahmanna tluantling siam a, India Danpui (Constitution) a dahtu leh chumi vawnghim tura rintlak awm chhun Political Party chu Indian National Congress hi a ni tih kan hria a. Kan ram, kan hnam leh kan sakhaw him nan Central sorkara a fawng chelhtu a nih leh ngei nan theihtawp kan chhuah zel ang.
3. Kan ram leh mipuite hmasawnna kawnga chak taka kan kal theih nan rorelna dik leh rorelna tha kan ramin a mamawh tih Congress party chuan kan pawm a; rorelna dik leh tha tungding turin theihtawp chhuahin hma kan la zel ang.
4. Mizoram mipui ten pheikhai rual taka hmasawnna kawng kan zawh theih nan kuthnathawktu leh mahni thiam thil hmanga eizawngten eizawnna hlawk leh ngelnghet an neih a tulin, chu chu kan ngaih pawimawh hmasak tur a ni tih Congress party chuan kan puang a. Chumi atan chuan NLUP changtlung zawk leh Tang Puihna kaikawpin ruahmanna tha leh changtlung kan siam ang.
5. Kan ram leh kan hnamin hmasawnna tluantling a neih theih nan leh chhungkaw tinin nuam taka nun kan hman theih nan mipui ten hriselna tha leh inenkawlna (health care) tha kan mamawh tih Congress party chuan kan pawm a. Hriselna tha zawk leh inenkawlna (health care) tha zawk kan neih theih nan ruahmanna tha kan siam ang.
6. Kan ram leh hnamin hmasawnna tluantling a neih theih nan kan tu leh fate mi puitling leh rintlak, mahni ke a ding theia kan chherchhuah a ngai tih Congress party chuan kan pawm a. Chumi tana chuan zirna (education) tha kan mamawh a, kan tu leh faten zirna tha an neih theih nan Education Reforms changtlung tak kan duang ang.
7. Hmasawnna hna thawk turin a hlawkna teltu tur (direct stakeholder) te an tha ber tih Congress party chuan kan pawm a. Khawtlang/veng chhung enkawlna leh hmasawnna hna dik taka a nih dan tur taka thawh a nih theih nan khawtlang mipuite kuta thuneihna sang tak leh mawhphurhna sang tak dah turin Village Council leh Local Council Reforms changtlung tak kan duang ang.
8. Kan ram hmasawnna daltu lian ber pakhat chu hlemhletna (corruption) a ni tih kan pawm a. Corruption na taka do a nih theih nan Mizoram Lokayukta thuam chak leh thuneihna sang zawk pe turin hma kan la ang.