- Vanlalzawma, Muallungthu
Hun inher hian hringnunah a ni emaw, thil dangah pawh; khuarel inhêr vel leh kawng tinrêng maiah hian danglamna hi a thlen thin a. Tin, ngaiteh, chu hun inhêr zel thin avang chuan naktip lawk maiah khian kum hlui hi liamin kum thar kan lo chuang kai leh mai dawn ta. Hun hi a vân kal châk ngai em!
Nimin zînga ni chhuak, tlai lama liam leh ta kha tukina rawn langchhuak leh tho kha a ni. Chu ni chhuak liam leh ta mai anga kan hriat leh kan hmuh chuan kan khawsak phungah te, kan hun hman danah te leh thil dang tam takah danglamna a rawn herchhuahpui fo a, a liampui leh bawk thin. Chu chu khawvel kal phung leh hringnun kal phung chu a ni si!
Hun inher hian thil reng reng hi a tha lamah ani emaw, a tha lo lamah pawh thil tam tak a rawn herchhuahpui thin. Hun inherin danglamna a rawn herchhuahpui thin avang hian ram hruaitu leh roreltu pawh an inthlak fo thin a. Hruaitu thar hmêl kan hmuh hian mipuite hian beiseina sâng tak kan nei thin. A tha zawng leh hmasawn zawnga ram intodelh ni tura min hruaiturin kan beisei a ni ber. Ram hmasawnna nasa tak thlen tur leh a tha zawnga danglamna nasa tak rawn thlen turin ram hruaitute chu mipuiten kan beisei a. Kan beisei ang chu a takin thleng ngei se kan ti bawk thin.
Kan hma lawkah hian kum thar kan lo chuangkai leh dâwn ta reng mai. He kum thar lo thleng hian ram leh hnam tana thil thar duhawm, mipuite hmasâwnna tur, ramin changkanna leh intodelhna lamtluang a zawh theihna tur kawng min kawhhmuhin min rawn thlen se tih hi rinna mita mipuite’n kan beisei leh thlir chu a ni.
He rama cheng, ringtu tha Kristian inti, thil awlsam zawk dapa zawng rúai renga khawsa thin, dan dik leh dik lo pawh ngaihtuah lo-a zankhat thil thua hausak thut tum, pheichham man tuma phe rúai thin, mahni tanghmâ chauh thlîra midangte hi bet se, keiin midang aiin chang tam bîk ila tih nunpui, dik lo taka sum leh pai neih hreh miah lo, kheh puam leh chiah puam pawh hreh chuang lo, Chawlhni a lo thlen apianga khiangkawi ipte nena ringtu tha ber ang maia inkhawm kal kim lâwmman dawng thei khawpa Pathian thusawi leh inkhawm erawh uar viau si, inchei nalh tak chunga Biak Ina lâwi kûr zut thin te hian, he kum thar lo thleng tur hi engtin nge hmachhawn kan lo tum let
Kum sul a lo vei ang a, he danglamna khawvelin a rawn hrin chhuah, kan ram pawhin buaipui berah neih ta ila thil tha tak ni tur, kan haidêr emaw tih mai tura mit kan siai san, kan ram leh hnam thanmawh bâwk leh min eichhetu ti hiala sawi ngam eirukna/hlemhletna (Corruption) lo nasa lutuk ta anga lang hi kum tharah hi chuan sirah hnawla hnawt bo ngam tur hian kan rilrute hi tih thar lo ni teh se. Vantlang mipuiten titi thângvaa an sawi thin ‘restricted tender lêm’ tih te leh ‘departmental work lêm’ tih ang reng te hi an sawi anga thil thleng tak tak anih ngai chuan, dik lo taka thil tih a nih thin avangin, heti anga thil tih te hi a lo awm tak tak anih chuan he kum hlui liam rual hian liam bo tîr ngam ila, danin a phal loh sorkar hnathawk aikal lâk ang chi te pawh hi kum tharah chuan a-rim a-ra pawh hre tawh lo turin leh dan dik tak anga hmala tur hian kan pheichheh pawh uluk lehzual ta ila, kan biak Pathian pawh hi a vân lawm dâwn em!
Kum hi a hlui emaw a lo thar tak avang emaw hian thu dik hi a danglam ve ngawt thei lo. Khawi hmun leh hunah pawh hian thu dik chu thu dik a ni reng a. Keimahni mihringte zawk hi kan danglam thin avang hian thu dik chu a danglam ve ngawt chuang lo. Chuvangin, he kum thar lo thleng tur hian kan ram leh hnam tan hian thil tha lo leh dik lo, tuna kan do ngam loh avanga kan tlakchhiatpui tam tak ni anga lang pawh hi a tha zawngin danglamna rawn thlen se, kan hma lawkah kum thar lo herchhuak hian rawn herchhuahpui ngei se tih hi mitinten kan duhthusam leh beisei tlat chu a ni.
Kan ram hian politics kan hriat dan leh kan kalpui dan hi a fuh lo ti ta ila mi nuih kan ti za em lo’ng chu! Politics hi eizawnnan leh sum siamnan hman kan tum nasa ta lutuk nia lang hi a pawi tak meuh a. Chu chu kan ram leh hnam min eichhetu pawh a ni. Chuvang chuan, a hman remchang apiang hi political party ah an zuanglut ta mai thin ni hian a lang. Mi tam tak ten heti anga politics kan khelh nachhan ni anga lang pawh hi he kum thar lo thleng tûrah hi chuan insiamthain, sim i tum teh ang u. Eizawnna atana hman tum ang zia zânga political party-a kan han inhmang ve thin hi chu kum thar lo thleng turah hi chuan i sim ngam ang u.
Kum a han thar ang a. Mi thenkhatte chu khawtlanga pâwl eng eng emaw-ah chanvo chan tumin an han hmanhlel leh ngei ang a. Chuti ang mite chuan nihna eng emaw an han chelh chiah hian ram te, thil tih theihna te, ropuina te, rorelna te, chawimawina te hi kan chanvo emaw tiin midangte chunga inlulin-nan kan hmang leh ngei ang. Eng pawlah pawh hian nihna chuha phili buai a, phesek thin ho hi khawtlang tana mi tangkai tak aiin mi dangte tana hnawksak an ni duh fo. Chuti ang nun chu he kum sul vei hian liam pui se, kum tharah chuan heti ang thil hi hnawl bo ni mawlh tawh teh se.
Kum sul a han vei ang a. Hlêmhletna leh induhsak bikna uchuak awm thin anga an sawi thin te pawh hi kan ram leh hnam nunphung min eichhe nasa bertu a nih avângin he kum hlui hian liam bopui se kan ti vek awm e. Mi hlêmhlete chu kan ram leh hnam tan hian mi hnawksak leh hmelma lian tak an ni a. Chuti ang mite avang chuan kan ram hian ei leh bara intodelhna tur pawhin kawng dik a zawh thei lo fo thin. Thil ti thei chinte lah chu lalna leh sum leh pai chauh an um emaw tih mai tur an ni fo. Ram leh hnam hi an hmangaih dêr a, an vei dêr emaw tih mai tur an ni fo si thin! Chuvang chuan, mipui tam zawk; keini mi retheite chuan heti anga khawsa thin te hi enliam mai harsa kan ti thin. Mahni chhungkua leh duhsak zawngte chunga an thiltih dan kan hmu a, kan hriat ve fo phei chuan a tuartu niha tuar dan thiam hi harsa kan ti hle thin anih hi !
Engpawh khawpawh chu lo ni se, kum leh thar lo herchhuakin kum sul a han vei ang a. Keini mi harsa te te ten Tlumtea thlir taka kan thlir, beiseina sâng tak nena kan nghah, hleih bik nei loa rorelna, rualkhai taka rorelna ni chu a la rawn her chhuak ve ngei ang tih kan ring a. Kan tan hian mahni intodelh ve tura leirem rah ni a la rawn herchhuak ve ngei ang tih pawh hi kan ring a. He kum sul vei hian kan tawngtaina pawh hi a hlawhtlinna min hmuh tir ngei ang tih pawh kan ring ve tlat!
Tichuan maw ngaiteh, kum sul tam a liam hunah ngat phei chuan he khawvel inher velin danglamna a rawn thlen thin avang hian, “Kan hunlai chuan…” tiin kan vanglai hun, kan sulhnu liam tawh hnute hi tute emaw kawt tualah, thlasik nilum hnung puak chungin, kuhva ei sen huam a, a remchang lai apianga chil pik liam puat puatin, zo zial pak khu luih luih chungin kan la sep ve vel mai mai ang a. thangthar lehzual zawkten ‘mimawl’ ti a min thlîrin, biak tlak pawha min ngai loin min la en liam ve vel mai mai dawn si a!
Chutih hunah meuh chuan, khawvel hi siam tirh anih atanga tun thlenga thu dik la ni reng, mihring tute mai pawh kan intluktlanna awmchhun “thlanmual” bak he khawvelah hian chanvo leh chanpual kan nei tawh lo ang. Kan tu leh fate (kan la nei ve te anih ngai chuan) chuan, kan hming tak ngial pawh an rawn hre chhunzawm tawh lo ang. An titi-ah pawh kan chanchin hian hmun a luah pha hek lo ang a. Chhete tal pawhin min sawi ri ngai hek lo ang!
Chu chu; kum sul liam thin leh he hringnun danglam thinin a ken tel, khawvel nihphung tur renga Siamtu duan lawk, mitinin kan pumpelh theih si loh chu a ni zel dawn tak si a. Chhingmit hi târ si loin kan kum chhiar hi a tam chho zêl ringawt mai dâwn chu a ni tak si a le !