Aizawl: MPCC Treasurer Dr Lalmalsawma Nghaka chuan media zahawm tak hi ram hruaituten thu dik tawk lo leh thu belhchian tawk lo sawi mai mai nan an hmang thin chu pawi a tih thu a sawi.
Nilaini khan Aizawl District Congress Committee chuan Congress Bhavan-ah ‘Media Training’ an buatsaih a. Hmanpuitu Dr Lalmalsawma Nghaka chuan media zahawm tak hi ram hruaituten thu dik tawk lo leh thu belhchian tawk lo sawi mai mai nan an hmang thin chu pawi a tih thu sawiin, “Kan ram mipuite hian thu dik tak an hriat hi an dikna chanvo a ni tih hre nawn se ka duh hle,” a ti.
Dr Lalmalsawma Nghaka chuan, “ZPM leh MNF-ten zir chian tak takna awm lova mipuite hnenah an tihhlawhtlin theih miah loh tur mumang an zawrh thin ang hi ram mipuite tan a him lo,” tiin, beidawnna thlentu mai a ni thin tih vawiin ni-ah a lang chiang hle tih a sawi.
Health care chungchangah ringawt pawh hian Congress sorkar lo thatzia leh a hun takah mipuiten an health care bill an la zat zat theih thin kha vawiinah chuan dam lo mangangten an chhui letin an ngai vawng vawng tih sawiin, “MNF sorkar khan health care bill kha a kum a kum mipuite an batsak thin a, mipui an mangang hle a nih kha. ZPM a rawn sorkar ve leh a, research base-a kal inti siin thla ruk an sorkar hnuah October atanga March, 2025 atan health care bill hi chhungkaw khat tan cheng nuaih 1 an rawn ti thei hram ta chauh a, natna khirkhanin a tlakbuakte tan a beitham hle a ni,” a ti.
He hunah hian MPCC General Secretary Dr. Lallianchhunga pawhin thu a sawi bawk.