Taliban Refugee Minister Khalil Haqqani chu Kabul-a a ministry chhungah thihchilh bomb hmanga thah a ni a, hei hi kum 2021-a Afghanistan-a an pawlin thuneihna an chan leh hnua mi pawimawh beihna lian ber a ni.
Haqqani-a’n an pisa a chhuahsan dawn chiaha bomb tihpuahah hian mi dang paruk an thi bawk niin interior ministry chuan a sawi.
Haqqani-a hi Taliban-a pawl chak tak, Haqqani network an tiha member pawimawh ber pawl niin khawvel huap firfiak niin US chuan a puang.
Islamic State (IS) chuan he beihna hi an tihah an chhal.
IS-in ‘news agency’ Amaq kaltlanga thu an chhuahah an pawl miin minister pisa kawtah lo nghakin a lo chhuah chuan a bomb pai a tipuak ta niin an tar lang.
Taliban thupuangtu pawhin Haqqani hi IS thah a nih thu a sawi bawk niin Reuters news agency chuan a sawi.
Haqqani-a unaupa, Jalaluddin-a hi hel pawl hruaitu hriat hlawh tak niin kum 1980 chhovah khan Afghanistan-ah Soviet sipaite a bei nasa hle a, Haqqani network hi dinin kum 20 chhung Taliban an hel chhunga beihna lian tak tak thlentu an ni.
Jalaluddin-a fapa, Sirajuddin Haqqani pawh tunah hian Taliban sorkara interior minister a ni.
Kum 2021-a ram dang sipaiten Afghanistan an chhuahsan ruala Taliban-in thuneihna an chan leh hnuah venhimna a tha hret hret zel a, bomb puak leh thihchilh erawh a la thleng fo.
Tam tak chu Islamic State Khorasan Province (ISKP) chuan an tihah an chhal a, anni hi Islamic State-a inziak lut, Taliban dotu an ni.