Chhattisgarh, Narayanpur district-a venhim hna thawktute nena an inbeihnaah Maoist pasarih vel thah an ni tih police hotu sangin a sawi.
Inbeihna hi zing dar 3:00 vela Abujhmaad chhim lam ramngawa thleng niin police leh Central Reserve Police Force tangkawpin Maoist laka beihpui an thlaknaah a nih thu a sawi.
Narayanpur, Dantewada, Bastar leh Kondagaon district-a police hnuaia Personnel of District Reserve Guard (DRG) kalkhawm leh CRPF team ten beihpui hi an thlak tih a sawi bawk.
Inkahna nasa tak a thlen hnua an tawp hnuah Maoist ruang pasarih, uniform ha hmuh zui a ni ta a. Mi dang an la awm em tih um zuiin dap zui nghal zel a la ni bawk tih a sawi.
India sorkar hian Chhattisgarh, Bihar leh Madhya Pradesh velah Maoist helho hi a bei nasa hle a. Nasa taka an laka beihpui an thlak hnuah tunah chuan an reh sawt tawh hle a, tharum thawhna lian pawh an an thlen ngai meuh tawh lo va, an la awm reng thung.