Aizawl: Chief Minister Lalduhoma chuan Mizoram sorkarin ‘bana kaih’ policy hnuaiah infiammi theihna nei thate zawng chhuak turin Rs vbc 2.5 a ruahman thu sawiin, kum thar atangin hmalak tan tum a nih thu a sawi.
Nilaini zan khan Aizawl District pawna a hmasa ber ni turin Champhai Chhangphut Field Stadium Flood Light chu chief minister hian a hawng a. Sports Minister Lalnghinglova Hmar chuan khual zahawm niin CM hi a tawiawm.
Sorkarna an chan hnua project lian tham an kalpui hmasak ber te zinga mi ‘Chhangphut Field Flood Light’ kum khat chhunga hawn theih a ni ta chu lawmawm a tih thu sawiin Lalduhoma chuan, “Mizoram sorkar chuan ‘Ban a kaih’ hnuaiah infiammi theihna nei tha te zawng chhuak turin Rs vbc 2.5 a ruahman a. Kum thar atangin hmalak tan tum a ni,” a ti.
Chief minister chuan, “Sports-ah kal tum dan neiin, tinzawn neiin kan kal zel dawn a, infiamna hmunhma siamte ngaihthah chuang loin, chung hmunhmaa infiam tur infiammite chu ngaih pawimawh zawka nei chungin kal zel kan tum,” a ti bawk.
Khual zahawm Lalnghinglova Hmar pawhin thu sawiin Mizo thalaite chu football mai ni lo, infiamna dangah pawh hlawhtling turin sorkarin a duhsak tih sawiin, India sorkarin Olympics 2036 thleng tura ruahmanna a kalpui mek zulzuiin sports discipline thlan bikah hmalak tum a nih thu a sawi.
Lalnghinglova Hmar chuan Mizoram sorkar flagship programme ‘Bana kaih’ hnuaiah infiammite chu sorkarin an banah a kai dawn a, a bultanna atan Champhai District chhung ami, Tuipuiral Games-ah infiamna thar pahnih telh thar tum a ni a, Tuichangral Games-ah pawh infiamna thar pathum telh tum a nih thu a sawi bawk.