Kan Aizawl khawpui lunlai ani emaw, veng kilkhawr deuh ani emaw, kiltin maiah hian nula tlangval ruihhlo ngawlvei, kal deuh chhut chhut, meng deuh duar duar hi hmuh tur an awm hi ani ringawt mai a. Chu chang ani lova, ruihhlo hian zoram pum hi a chiah hneh ta hle. Thingtlang kilkhawr deuhah pawh ruihhlo addict an buaipui nasatzia tho an sawi a. Nu leh pa, khawtlang an rum a ni.
Heti hi kan ram dinhmun a ni a. Kan thalaite heti an nih chuan kan hmalam hun chu a thim hle tih a chiang khawp mai. Thalai tha tam tak kan la nei alawm, a rui leh nikhua lo ho chauh in sawi thin a, kan ti mai thei. Mahse, heng ho hi ngaihtuaha chinfel an nih loh chuan a dangah a kangkai a, a taidarh zel tih hi chian a pawimawh a ni.
Engtinnge kan tih tak ang. Tu chinfel turin nge kan dah ang le. Tudang mah kan ram chingfela enkawl tur hi an awm lova. Japanese pa in a rawn ngaihven dawn lova. Silchar pa phei chu an lawm zawk ang. Chuvangin kan ram hi nuam tura kan duh chuan heng ruihhlo ngaite hi kan sim tir emaw, a danga kangkai lo tura hma kan lak ngei ngei a ngai ta.
Mimal chuan tih theih a tlem em em a. Mahse sawrkar, NGO leh kohhran tha pui pui kan nei alawm. Sawrkar hi chuan tun bak hi an pel thei rih loah ngai ta ila. NGO lam hi chuan an veiin an buaipui nasa a. Tha pawh an thawh tam. Kan kohhran lam hian duh ang tawkin an la vei tawk lo nite hian sawi ani thin. Chuvangin kan kohhran hrang hrangte hi thapui thawhin heng ruihhlo ngaite hi han luhchilh leh deuh se tih hi beiseina awmchhun ani ta hial awm e. Kan kohhrante hian ramdangah missionary tam tak an tirhchhuah te hi a ropui em em rualin kan ram chhunga hnathawh hi uar lehzualin hma han la se. Missionary kan tirhchhuahte hmalakna pawh hi a pui zawk hialin a rinawm. Kan missionary te va kalna hian kan ram an rawn thlir a, kan dinhmun dik tak an rawn hmuh hian an hmalakna a ti thuanawpin hma an sawnna tur pawh hi a dal thei zawk tlat a ni. Kohhran hrang hrangin hma an lak dan turte hi hmunpui lam hian a guidelines rawn chhuah chuai chuai se ruihhlo venna kawngah hian hma kan sawn ngei a beiseiawm hle a ni.