Aizawl: Champhai North Bialtu MLA Er. H.Ginzalala, Adviser to CM (Tech) hovin nimin khan Khankawn Police Check Gate atanga Champhai luhka kawngpui laih zauhna tur, Mizoram sorkarin Rs vbc 6.5 a ruahman fel tak hnathawh dan tur an en ho.
Khankawn atanga Champhai kawngpui laih zauhna tur hian Ministry of Road Transport & Highway (MoRTH) hnenah DPR siama hmalak thin ni mah se, beisei anga ruahmannate puitling thei lo chu bialtu MLA Er H Ginzalala chuan theihtawp chhuahin ruahmanna lian zawk nen hma a la mek a, Mizoram sorkar pawhin Champhai mipuite mamawh zia hriain Chief Minister Lalduhoma leh sorkar hotuten a laih zauhna tur sum a ruahman ta a. Nakkum tir atanga hna thawh tan theih beisei a ni.
He hunah hian Champhai Bawrhsap VL Remliana, PWD Sr. Executive Engineer Ramsanga, PWD Road Div. JE te, Champhaia tlawmngai pawl hruaitu Lalnunmawia te, Sub-Hqr YMA President F. Lalrinmuana te leh sorkar mipawimawh dangten bialtu MLA hi an tawiawm a ni.