Lok Sabha MP Richard Vanlalhmangaiha chuan parliament winter session neih mekah nimin khan Manipur buaina chungchangah sorkar laipui chu remna palaia tanga hnam pahnihte dawhkan khat kilpuia an harsatna chin fel dan tur sawipui turin a phut thu a sawi.
Richard Vanlalhmangaiha chuan, “Sorkarin laipuiin kan unau Zohnahthlak – Myanmar, Bangladesh leh Manipur buaina avanga Mizorama raltlante tan chhawmdawlna sum leh pai thahnem tak Mizoram sorkar hnena a pek avangin thinlung takin lawm thu ka sawi a. Chutih rualin, Manipur buaina hian hun a hun a awh rei ta hle a, mi 200 chuang zetin nuna hlu tak an chan tawh a, mi 50,000 chuangin in leh lo an chân tawh bakah Kristiante biak in 300 chuang zet hal a ni tawh bawk,” a ti.
Sorkar laipui tan mahni ram chhung ngeia buaina thleng hi a chin fel dan ngaihtuah a hun ta hle tih sawiin Lok Sabha MP chuan, “Pathianin nunna hlu tak min pek hi kan zah tur a ni a, he buaina chin fel dan kawng tha zawk ngaihtuah thuai a nih loh chuan nunna tam zawk kan chân belh zel dawn a niin a lang. Tun dinhmunah hian sorkar laipuiin paramilitary force tam tak pawh tir lut mah se, heng community pahnihte inkara inremna a awm chuan si loh chuan an harsatna hi sut kian tak tak a nih a rinawm chuang lo,” tiin, central sorkarin community pahnihte dawhkan pakhat kilpuia an harsatna sutkian dan tur sawipuia remna palaia tang tura a phut thu a sawi.
Manipur buaina chungchangah hian Lok Sabha MP Richard Vanlalhmangaiha hian a ngaihdan leh dinna sawi tura zawhna vawi eng emaw zat a lo dawng tawh a; mahse, a sawina hmun tur platform dik taka Manipur buaina chungchang auchhuahpui hi a finthlak bera a hriat avangin, nimin khan Lok Sabha parliament winter session-ah a au chhuak ta a ni.