Aizawl: Excise Minister Lalnghinglova Hmar chuan Mizoram sorkar chu mipui sorkar a nih angin ruihhlo do kawngah pawh mipuiin sawi nei ve se an duh thu leh sawiselna pawh an pawm vek thu a sawi.
Ningani khan Champhai Keifangtlang-a DC Conference Hall-ah Ruihhlo Do chungchang sawihoin an thutkhawm a. He hunah hian Champhai North bialtu MLA Er. H. Ginzalala, KVI Board Chairman Lalremliana, Excise & Narcotics Secretary Lalramsanga Sailo, Bawrhsap VL Remliana, SP Shivendu Bhushan, sorkar official-te, village council, tlawmngai pawl leh kohhran hruaitute an tel.
Thutkhawm kaihruaitu, excise minister chuan ruihhlo do dan tur hrilh turin Champhaiah a kal lo tih sawiin, “Champhaia ruihhlo do dan tur chu Champhai miten in hre zawk a, in ngaihdan leh rawtna te ngaithla a, thawhhona tha zawk a awm theih dan tur sawiho turin kan lo kal a ni,” a ti.
Minister chuan ruihhlo dona kawngah Mizoram sorkarin theihtawp chhuah a inhuam a; amaherawhchu, sorkar tha ringawt chu a tawk lo tih a sawi a. He mi kawngah hian sorkar, khawtlang, tlawmngai pawl leh kohhrante thawhho a ngaih thu sawiin, “Ruihhlo that lohzia inzirtirna chu nasa leh zual zawkin zirna in leh kohhran thalai inhmuhkhawmnaah te sawi a tul a ni,” a ti bawk.
He hunah hian Champhai North bialtu MLA Er H Ginzalala’n thu a sawi bakah Joint VC hruaitute, Sub Hqrs YMA hruaitute, Kohhran hruaitute leh sorkar official ten ruihhlo do kawnga hma an lakna te leh an ngaih pawimawh te an sawi a. Peter Zohmingthanga, Jt. Commissioner, Excise & Narcotics Department chuan Narcotic Drugs & Psychotropic Substances (NDPS) Act sawifiahna hun a hmang bawk.