Aizawl: Chief Minister Lalduhoma chuan Serchhip Zawlpui chu adventure tourism hmasawnna atana hmun pawimawh tak a nih thu a sawi.
Serchhip Zawlpuia buatsaih International Paragliding Accuracy Championship leh Air Sports Festival 2024 chu Inrinni khan khar a ni. Kharna inkhawmah chief minister chu khuallian niin a hmanpui a. Thu sawiin ram dangte nena inpawhna leh inthianthatna siamna kawnga hun pawimawh a nih thu a sawi a. Mizoram chu adventure tourism hmunpui a nih theih dan a sawi bawk.
Serchhip bialtu ni bawk, Lalduhoma chuan Serchhip khawpui boruak muanawm, mawi leh hmuhnawm takah paragliding atana hmun tha tak a awm chu lawmawm a tih thu a sawm a. Helai hmun hi India rama adventure sports atana hmun tha ber pawl a nih avangin adventure tourism hmasawnna atana hmun pawimawh tak a ni, a ti.
Tualchhung Mizo pilot-te thawhrimna chu lawmawm a tih thu leh a chhuan thu chief minister chuan a sawi a. Heng pilot-te inpekna leh thiamna te bakah Mizoram sorkar, MASA, FAI leh Serchhip mipuite thawhhona tha tak avangin he championship hi a hlawhtling a nih thu a sawi.
He huna khual zahawm, Tourism Minister Lalrinpuii pawhin thu sawiin, International Paragliding Accuracy Championship hlawhtlinna tura thawktu zawng zawng chungah leh, ram dang atanga lo kalte chungah lawmthu a sawi bawk.
He championship-ah hian ram paruk- India, Korea, Kazakhstan, Spain, Indonesia, leh Nepal atangin infiammi mi 30 an tel a. Kharna inkhawmah hian pilot tithate hnenah lawmman hlan a ni.