Arsenal chuan league hmahruaitu Liverpool an thlauhna tizim turin inrinni zan khan an mualah Everton an lo mikhual a, goal awm lovin an inhnehtawk.
Mikel Arteta naute hi table-ah pathumna an nih chhunzawm zel a, league hmahruaitu Liverpool aia game khata khel tam chungin point ruk zetin an la inthlau mek.
Gunners hian ball possession 76% neiin, shot vawi 13 an nei chungin Everton lakah hian goal an khung thei lo.
Arsenal hian England number 1 keeper Jordan Pickford an paltlang thei hlawm lo a, second half-ah Bukayo Saka pek chu tha taka lo dansakin, save ropui bik a ni hial.
- Liverpool chak zo lo
Anfield-ah Liverpool chuan Fulham lo mikhual ve bawkin, goal hnih ve ve inpein an inhnehtawk.
Reds player pawimawh Andy Robertson chuan an mualah hian red card hmuin, hei hi inkhel thlak danglamtu leh an chak loh chhanah pawh a puh theih awm e.
Inkhel tan atanga minute 11-naah Andreas Pereira chuan mikhual team tana goal hmasa ber khungin, minute 47-naah Gakpo chuan an siphurh a sut.
Liverpool chuan second half-ah chak ngei tuma bul rawn tanin, an game a rawn hmuhnawm thar leh viau a, mahse goal khung hmasa zawk chu Fulham niin, Muniz chuan minute 76-naah 2-1 a hma an hruaina ni turin a ti goal.
An chak lo mai dawna a lan hnuah Liverpool chuan hun tawpah ti goal-in, Jota chuan minute 86-naah an in draw-na goal ni turin a ti goal a, team pahnihte 2-2 in an inthathen.
Inrinni zan inkhel dangah Newcastle united chuan Nistelrooy hnuaia phur thar Leicester city chu 4-0 in an hneh a, Ipswich Town in Wolves 2-1 a hnehin, Nottingham Forest chuan an mualah Aston Villa chu 2-1 in an lo hneh bawk.