Aizawl: Falkland khawtlangin an veng chhung kawnga (world bank road) lei tlahniam hnatlangin Inrinni khan an siam tha.
Falkland veng chhung kawng hi kumin May thla khan Cyclone Remal avanga tla hniamin Mizoram chhim lam panna kawngpui chu a zatve dawn a tlahniam a. Kawngpui hi siam that mai a nih loh avangin Falkland Local Council kaihhruaiin an veng mipuiten a siamna tur sum an thawhkhawm a, hnatlangin an siam a ni.
Local council hruaitute chuan kawngpui siamna tur sum an thawhkhawmah Rs 70,000 vel a lut tawh a, sum hi an dawn belh zel tih an sawi.
Local Council hruaitute chuan kawng hi tun hnai khan a chhe zual nasa hle a. Local council pawhin vawi tam an siam tawh thin a, sorkarin kawng an siamna sum senso pe let leh tura an insawi pawh tun thlengin cheng khat mah sorkar atangin an la hmuh loh thu an sawi a. He kawngah hian two wheeler-te tun lai hian accident nasa hle a, truck pawh a leh mai hlauhawm khawpa a awm tak a vangin, khawtlang mipuiten sum thawhkhawm hmangin local council huaihawtin hnatlanga siam a ni ta tih an sawi.
Falkland khawtlang chuan an veng chhung kawng an siam chungchangah te, chhiatna nasa zawk leh nunna hial chân palh theih a nih avangin mipui nunphung an tihkhaihlaknaah mipuite hriatthiamna an ngen nghal bawk.