Union Home Minister Amit Shah chuan Pathianni khan sorkar leh Chhattisgarh sorkar chuan an state atangin Maoism chu March 31, 2026-ah tihbo an tum tih a sawi.
Police Parade Ground, Raipur-a President’s Colour Award semna inkhawm a hmanpuinaah Shah chuan Chhattisgarh police-in kum liam ta chhunga Maoism laka an hlawhtlinna a tar lang a. Hetih chhung hian Maoist 287 thatin 1,000 an man a, 837 an inpe bawk.
Shah chuan ‘Chhattisgarh chu Maoism laka a fihlim a nih chuan ram pumin hlawkna tam tak a neih phah dawn’ niin a sawi.
Police-te chu Naxal0ten tharum an thawhna thin tudai tura an thawhnaah fakin state police bakah sorkar laipui hnuaia venhim hna thawktute nena an tanhona pawh thil lawmawm tak a nih thu a sawi bawk.
“Kum 40 chhunga a vawi khat nan Naxal-te tharum thawhna avanga civil mi leh venhim hna thawktu thi chu 100 tling lo ve ve a ni,” a ti.
Heng thil hi Prime Minister Narendra Modi-a kaihhruai sorkar hlawhtlinna a nih thu a sawi bawk.
Shah hian Chhattisgarh sorkarin Maoist hela tang thinte a chhawmdawlna pawh sawi chhuakin, tharum thawha rammu thin lo kira nunphung pangngai zawhtute chu pui zel turin a ti.
Naxalite-te chu state sorkarin surrender policy a kalpui mek chu remchangah hmanga inpe tur leh hmasawnna chu thlang zawk turin a sawm bawk.
“Kan zavaia tanghona avangin Naxalism hi Chhattisgarh atang hian March 31, 2026 hmain kan titawp vek dawn a ni,” a ti.
Shah hian President’s Colour Award chu hnathawk tha leh inhlante chawimawina chauh ni lovin Chhattisgarh police-te hun kal zela fuih kaltu a ni tih a sawi bawk.