Mizoramah mi malin boxing gym leh training centre mumal taka an kalpuiin awmzia a nei a, Zudio LPS Pro Fight weight hrang panga zinga pathumah NTP training centre hnuaia mite an champion.
December 6 khan Pro Fight vawi 11-na title fight zawh fel a ni a, Chite Venga inbun NTP boxing training centre atangin Lalrinngheta’n flyweight title hnek chhuakin, Pro Fight-a an tel vawi khatna ve veah Lallawmawma’n welterweight champion lai a hneh a, Lalkhawngaiha’n C Lalhruaitluanga hnehin champion kawnghren a hreng bawk.
NTP-in zirtirtu atan Pro Fight lightweight-a vawi thum champion tawh Lalmuanpuia an ruai a, Pro Fight-a champion tawh NT Lalbiakkima leh Laldingliana te inbuatsaihna hmun a nih bakah, boxer beiseiawm tak takten inzir nan hmang a, Pro Fight zo taah champion ngah ber niin an hnuai atangin Tuipui tlangval pahnihin title an la a, 2022 bantam champion Rinngheta’n fly title fight-ah Alpha Gym, Bawngkawna inpuahchah Vanlalenkawltir a hneh a, NTP-ah hian National Games silver medal la tawh Lawma intuai hriam bawkin welter champion lai Lalruatzela Hauzel a hneh ve thung a, Tuipui boxer pakhat aia tam an champion vawi khatna a ni nghal bawk.
Venghlui rawlthar Khawngaiha’n NTP hnuai atangin light title fight-ah amah aia tawn hriat nei tha zawk Cherhlun tlangval Hruaia a hneh a, Title Fight-ah hian fighter of the night a nih bakah championship chhunga Promising Boxer lawmman a dawng tel a ni.
NTP-in weight hrang panga zinga pathum an hui bak pahnih dang Boxing coach R Lalchhuanawma din Sete Academy-in an la ve thung a, WBC Youth world champion Laldinsanga’n bantam title humhimin Omega Lalramdina a hneh a, an pahnih hian tunlaia boxing zirna hmunpui Sete Academy, Mission Venga inbuatsaih ve ve an ni. Kum 21 mi Dinsanga hi a vawi thum nan Pro Fight-ah a champion a, tum thum a zawnin best boxer-a thlan a ni a, Mizo zingah khawvel puma professional rating sang ber ni mekin bantam-ah 99-na a ni.
Sete Academy atang thoin F Lalthanliana Junior chuan middle-ah nikum title fight-a a hneh loh C Lalhruaitluanga kut atangin champion kawnghren a chhuhsak ve thung a, Tuipui ang bawkin Dinsanga nen Lunglei boxer pahnih an champion a ni.
Sete Academy-a inbuatsaih thin Chawngtlai boxer Hruaia hi tunhnaia din TD Boxing Academy, Mualpuiah a inpuahchah ve thung a, TD leh Alpha-in title fight-a inlan thei boxer an neih bakah HB Boxing, Hunthar, MSR Gym, Upper Republic leh mi mal boxing gym dang atangin beiseiawm tak tak an awm nual a, sorkar hma lakna piah lamah Mizoram boxing hmel thar lantirtu an ni hlawm.