Chief Minister Lalduhoma chuan Olympic 2036-ah India aiawha Mizo thalaite an tel ve ngei theih nan an inpuahchah nasa dawn tih a sawi.
Thenzawl khaw chhuak, Supply Minister B Lalchhanzova’n a nu leh pa, B Lalthuamliana leh Rohnuni te hriatrengna football tournament, Thenzawl Zone Football Association nen Lothazawl Playground, Thenzawla an buatsaih kharna inkhawm chu Inrinni khan neih a ni a. Hun hmanpuitu, chief minister chuan India ram hi 2036-ah Olympic thlen tumin a inbuatsaih mek a, hetah hian India aiawha Mizo thalaite an tel ve ngei theih nan Vision 2036 chu Mizoram sorkarin a kalpui tih a sawi a. Sports minister hovin Olympic discipline an lo inpuahchah ve theihna kawngah an inpuahchah nasa dawn tih sawiin, “Kan tum ber chu kan naupang, talent neite zawh chhuaha, training peka India aiawh thei tura chher a ni,” a ti.
Lalduhoma chuan football hi khawvel ngaihhlut infiamna a nih angin a thiamte tan eizawnna remchang a tam a. Tunah pawh hian Mizo tlangval zingah eizawnna atana hmanga hlawhtling tak tak an awm chu a chhuah thu a sawi a. Tuna footballer langsar ber berte hi retheihna leh harsatna tam tak paltlangtute an ni a, tih tak takna nena bei tan chuan dinchuahna kawng hi a awm tih a sawi.
Serchhip bialtu ni bawk, Lalduhoma chuan Thenzawlah MLA fund leh fund dangte hmangin indoor volleyball stadium din an tum mek thu leh community hall pawh an ngaihtuah zui tur thu leh Thenzawl khawtlangin football house din an dil pawh a kawng an zawn tur thu a sawi bawk.
Tournament bultumtu, Supply Minister B Lalchhanzova pawhin a pa, B Lalthuamliana leh a nu, Rohnuni te hriatrengna tournament hlawhtling taka buatsaih a ni chu Thenzawl Zone Football Association chungah lawmthu sawiin, chief minister kaihhruaina hnuaia hmasawnna hna chak taka thawh a nih mek thu a sawi.
Inkhawm hi Liantluanga Renthlei, President, TZFA-in a kaihruai a. tournament-ah hian team 13 telin heng zinga team pathum hi Thenzawl pawn lam an ni.