Aizawl: Union Road Transport & Highways Minister Ajay Tamta chu nimin khan New Delhi-a a pisa-ah Lok Sabha MP Richard Vanlalhmangaiha hoin Mamit Joint Village Council member-ten an kawm a, NH44A/108 siam that vat a nih theih nana re-tender sanction vat tur leh Mamit district kawngpui hrang hrangte siam that dan tur an thlen.
Union Minister Tamta hnenah Mamit VC-te chuan Mamit district chu aspirational district a nih angin ngaih pawimawh a tul thu hrilhin NH44A/108 chu thangkhat lian dawn siam a nih hnuah pawh la siam zawh a la nih loh avangin mipuiten nasa taka an tawrh thin thu te, a bik takin furah inkalpawhna kawngpui a that loh avangin buaina leh harsatna an tawk nasa thin thu te an thlen.
Mamit VC hian NH44A/108 chu a siamna tur pawisa sanction vat a nih loh chuan nakum furah tun aia a chhiat nasat dawn avangin tun thal chhung ngeia a siamna tur pawisa sanction vat a nih theih nana hmalaksak turin an ngen a ni.
Hei bakah hian Mamit district chhunga kawngpui hrang hrangte pawh siam that a nih theih nan an ngen nghal bawk.
Lok Sabha MP Richard Vanlalhmangaiha pawhin Mamit district chu Mizorama aspirational district awmchhun a nih avangin khawtlang hruaitute mamawh thlen chu ngaih pawimawhsak turin a ngen.
Union minister chuan an thu thlente chu chak taka a lo bawhzui tur thu leh theihtawp a chhuah tur thu lo hrilhin remchang hmasa berah Mizoram leh Mamit district tlawh a zin a tum thu a sawi bawk.
Mamit Joint VC-te hi Lok Sabha MP bakah Lalbiaknunga, Sr. Engineer PWD pawhin a tawiawm a ni.