Aizawl: Mizoram Larsap Dr. Hari Babu Kambhampati chuan Mizoram Youth Commission (MYC) Chairman Malsawmzuala Ralte chu Raj Bhavan-ah kawmin MYC hmalakna hrang hrangte leh hmachhawpte a sawipui.
Nimina an inkawmnaah larsap chuan India ram hmun hrang hranga hnathawh tur remchang tam tak awmte Mizo thalaiten an hmuh theih nana chak zawka hmalak a tul thu a sawi a. Zirna sang zawk bel lo, thingtlang kilkhawr zawka awmte thlengin an kumin a phak phawt chuan hna an hmuh theih nana puih a tul thu leh, qualification leh an tuina azir zela thalai hna zawngte register-a data mumal tak neih fel hmasak a tul thu leh, hna a awm veleha an zawm theih nana lo inhmakhua lawk a tul thu a sawi.
Larsap chuan Mizo thalaite chu mahni awm hmun chhuahsan hreh lo tur leh hmun danga hna zawnga chhuah tum turin a fuih a. Hmalaknate zau zawka puanzar a tul thu sawiin, MYC hotute chu Mizo thalaiten hna tam zawk an hmuh theih nana theihtawp chhuah turin a chah a, puih a tul huna pui tura a inhuam reng thu a hrilh a ni.
MYC Chairman Malsawmzuala Ralte chuan financial year 2024-2025 kal meka an hmalaknate larsap hi hrilhin thalai 43-ten MYC kaltlanga hna an hmuh thu a sawi a. Larsapin thalaite hmakhua ngaia state danga hnathawh tur a ngaihtuahsak thin leh tun hnaiah a hmalaknaa Sri City, Andra Pradesh-ah Mizo thalai pariatten hna thar a hmuh avangin lawmthu a sawi a. MYC hmalaknate a ngaihven reng thin avangin lawmthu a hrilh bawk.