Aizawl: MNF President Zoramthanga’n sorkar tharah sum leng vak a van thu a sawi.
Thawhtanni khan MNF chuan Mizo Hnam Runah kumin 2024 atan ‘Mizo Hnam Run Kharna’ hun hmangin MNF-in ni pawimawh tak tak paruk a neihte zinga pakhat, ‘Exodus Day’ an hmang. Martarte hriat reng nan minute khat chhung ngawi renga din a nih hnuah a huhova tawngtai rual a ni.
He hunah MNF President Zoramthanga chuan sorkar tharah sum leng vak a vân thu te, Mizoram sorkarin ni 100 inhlawhna a batsak reng chu pe thuai tura a phut thu sawiin, “MNF hun lai chuan central atangin sum sanction lo mah se advance-in kan pe zel a. Mipuiin Krismas leh kum thar hlim taka an hman theih nan sorkar hnathawk hlawh leh thil dang dang pe thuai tura sorkar ka phut a ni,” a ti.
Zoramthanga chuan Exodus Day lo chhuah dan sawiin, “December 16, 1971-ah East Pakistan khawpui Dhaka, tuna Bangladesh ni ta hi India-in a lak tuma MNF headquarters, Rangamati, tuipui zau tak hual vel kara awm, meilawng pasarih hmanga mak tak maia Pathianin a hruai chhuahna ni a ni,” tiin, December 16 hi India sipaite tan hnehna ni ropui, an hmelma Pakistan tlawmna ni, ‘Vijay Diwas’ a nih rualin MNF sipaite tan pawh India lak atanga chhanchhuahna ni ropui a nih thu a sawi.
MNF president chuan rambuai kha Pathian ruat a nih thu leh kum thum chhung India nena indo hnuah tlanchhiat a ngaih thu leh harsatna tam tak karah India biak dan zawn a nih thu a sawi a. “Mihring tumna leh remruatna zawng zawngte kha lo hlawhtling se, vawiina kan inremna ang hi a chhuak lo ang. Kan hlawhchhamnate kha Pathianin Zoram tun din a tumna zawk a ni,” tiin, Pakistan President Ayub Khan remtihnain Pakistan-a an chhuk thu leh thinglubula dan chepna atanga an chhuah zalenna (Exodus Day) chu Laldenga leh a hote remruatna ni lovin, Pathian remruat a nih thu a sawi bawk.
MNF Vice President Vanlalzawma kaihhruai inkhawmah hian MNF Treasurer Lalruatkima pawhin thu a sawi.
Mizo Hnam Run hi kum thar January 13, 2025 (Thawhtanni) chawhma dar 11:30-ah hawn leh a ni ang.